Botërori i femrave, kërkesa e pandershme e teknikut të Holandës për lojtaren: van de Donk nuk donte ta bënte

Me golin e shënuar nga Stefanie van der Gragt në fillimin e pjesës së parë, Holanda arriti të marrë më të mirën ndaj Portugalisë në ndeshjen hapëse të Kupës së Botës për femra që po zhvillohet në Australi dhe Zelandën e Re. Një fitore që projekton tulipanët në krye të grupit, së bashku me Shtetet e Bashkuara, fitues lehtësisht ndaj Vietnamit 3-0. Pavarësisht fitores, megjithatë, pati vend edhe për polemika. Ato u shkaktuan nga sjellja e pandershme dhe sigurisht josportive e trajnerit të portokallinjve. Andries Jonker urdhëroi lojtaren e tij Danielle van de Donk të shtirej e dëmtuar.

KËRKESA E PANDERSHME E TRAJNERIT TË HOLANDËS

Duheshin edhe rreth njëzet minuta në ndeshjen mes Holandës dhe Portugalisë, me luzitanet të cilat po përpiqeshin në çdo mënyrë të shënonin golin e barazimit. Portugezet po ushtronin presion ndaj kundërshtarëve. Duke parë skuadrën e tij në vështirësi, trajneri holandez Jonker vendosi të adoptojë një taktikë aspak të ndershme. Në një video që po qarkullon në rrjetet sociale, në fakt, duket trajneri portokalli duke i bërtitur një prej lojtareve të tij. Thirrjet ishin për mesfushoren Danielle van de Donk, që të simulonte një dëmtim dhe të rrëzohej në tokë.

Van de Donk u shfaq menjëherë e hutuar dhe e padëshirë për të ndjekur udhëzimet e trajnerit të saj. Por më vonë, ajo e përmbushi kërkesën duke u rrëzuar në tokë sikur të kishte një problem fizik. Arbitri nuk mund të bënte gjë tjetër, veçse të lejonte hyrjen e stafit mjekësor holandez. Ndalesa e lojës theu ritmin e presingut portugez dhe i fitoi Tulipaneve sekonda të çmuara. Trajneri Jonker përfitoi edhe nga pushimi për të dhënë informacione të vlefshëm për ekipin. Një skenë jo e denjë për një Botëror, dhe sigurisht jo në përputhje me parimet e ndershmërisë sportive.