“Shqipëria, e lirë dhe e mirë”, ish-ushtaraku amerikan tregon pse zgjodhi vendin tonë për të jetuar me familjen –

Jeremy, një ish-ushtarak amerikan, ka zgjedhur të zhvendoset në Shqipëri për një arsye shumë të veçantë: kujdesin ndaj të birit, i cili vuan nga një sëmundje e rëndë. Ai thotë se ka gjetur këtu një vend më të përballueshëm për jetesë dhe një komunitet mikpritës.

“Çfarë më solli në Shqipëri është djali im, i cili ka një problem shëndetësor të quajtur Huntington’s Disease. Shpenzimet mjekësore janë shumë të larta dhe më duhet të punoj gjatë gjithë kohës. Unë jam ish-ushtarak dhe kam një pension, kështu që të jetoj këtu më ndihmon ta përballojmë jetesën dhe të fokusohemi tek kujdesi mjekësor i djalit tim. E kuptoj që Shqipëria nuk është shumë e njohur për shërbimet mjekësore, por është e përballueshme. Gjithashtu, djali im e dashuron, ai ndihet mirë këtu”, thot Jeremy Pierce.

Pavarësisht sfidave, ai dhe familja e tij janë përshtatur shpejt me jetën në Shqipëri. Për të, vendi ynë është një shtëpi e re, ku fëmijët e tij po mësojnë të duan kulturën dhe traditat shqiptare.

“Fëmijët e mi e dashurojnë Shqipërinë. Kalatë janë pjesa e tyre e preferuar, dhe pas tyre, ushqimi. Kam vetëm dy muaj këtu, por ne kemi vendosur të jetojmë këtu. Kemi një shtëpi në Sauk. Njerëzit janë fantastikë. Para se të vija, dëgjova përvoja të amerikanëve të tjerë dhe të gjithë thoshin sa mikpritës janë shqiptarët. Nuk e kisha imagjinuar se do të ndihesha kaq rehat vetëm falë njerëzve këtu.”

Përveçse është integruar në stilin e ri të jetesës, ai ndjek pasionin e tij duke dokumentuar përvojën në Shqipëri përmes videove me dron, për t’ua treguar miqve bukuritë e këtij vendi ende të panjohur për shumë amerikanë.

“Kur u thashë se do të jetoja në Shqipëri, pyetja e parë ishte: ‘Ku është kjo?’. Amerikanët nuk e dinë, por kur i tregoj pamjet e Tiranës, plazheve, kalave, ata mahniten dhe më thonë se duan të vijnë ta shohin… Dhe, më e rëndësishmja, mund të kujdesem për djalin tim. Shkurt, ne kemi rënë në dashuri me Tiranën.”

Jeremy pohon se Shqipëria nuk ishte në listën e vendeve ku mendonte të jetonte, por me kalimin e kohës dëshira për të qëndruar u rrit.