Po na ikin te Shqipëria

Trajneri i Kosovës U-21, Afrim Tovërlani, po vazhdon me deklaratat e papranueshme karshi Shqipërisë. Është e pamundur sesi një njeri që drejton në një post kaq të lartë Kosovën, të ketë dalje të tilla publike dhe të shprehet në këtë mënyrë kundër Shqipërisë. Perla e radhës nga Tovërlani i kalonte të gjitha caqet. Pasi e quajti tradhtar Etnik Brrutin që kaloi nga Kosova U-21 te Shqipëria A, këtë herë situata ka kaluar në ekstrem. I ftuar në Dueli Sportiv, Toverlani u shpreh:

“Nuk do të arrijmë asnjëherë të kualifikohemi në Europian apo Botëror nëse Shqipëria na shkatërron kështu, duhet të ndalet Shqipëria. Nëse nuk e ftojmë një lojtar, atëherë ta ftoj Shqipëria. I kanë disa avantazhe në Itali, lojtarët e Shqipërisë njihen si vendas dhe jo të huaj dhe në Rusi, njihet pasaporta e Shqipërisë, e Kosovës jo se nuk na njohin si shtet. Rusia po shkakton luftë dhe gjenocid ndaj Ukrainës dhe nuk e njeh Kosovën, mirëpo joshja e lojtarëve tanë për Shqipërinë, ka ndikim të madh. Nuk dua as të flitet për patriotizëm më tani. E kemi pasur zakon, i kam lejuar boksin e muzikës lojtarëve të Kosovës U-21 që të inspirohen para ndeshjeve me këngët Mora Fjalë, me këngët e Zahir Pajazitit dhe këngët e tjera patriotike që janë frymëzuar djemtë, nuk ia kam ndaluar, por tani ka ardhur koha që t’ia ndalojmë se këto nuk po vlejnë. Nuk e dija se paska lojtarë kosovarë që kërkojnë të shkojnë në një evenimet ku Shqipëria bëhet bashkë me Serbinë, këtë akoma nuk e kam ditur, tani e kuptova. Shqipëria po na shfrytëzon maksimalisht”, tha Tovërlani.

Pra trajneri i Kosovës U-21 do të ndalojë përfundimisht këngën Mora Fjalë që të mos dëgjohet nga lojtarët e Kosovës, pasi ata po frymëzohen prej saj dhe më vonë po ikin te Shqipëria. Ndërkohë pak kohë më parë u diskutua se përse kënga Mora Fjalë u hoq nga Air Albania dhe në Kosovë, po këta personazhe, dolën kundër FSHF pasi sipas tyre e hoqën këtë këngë pasi do të organizojnë Europianin me Serbinë. Edhe nëse kjo është e vërteta, është akoma më e papranueshme fakti sesi në Kosovë do të hiqet kënga Mora Fjalë për lojtarët pasi ata po zgjedhin që të shkojnë te Shqipëria dhe se kështu nuk do të vazhdohet më.
?
Ishte po kaq skandaloze goditja e ulët që Tovërlani bëri ndaj Etnik Brrutit vetëm për shkakun se shkoi te Shqipëria. Ai përmendi faktin se Rusia po sulmon Ukrainën dhe se nuk e ka njohur Kosovën, ndërsa në Rusi janë edhe shumë lojtarë të tjerë shqiptarë, ndërsa Vedat Muriqi, lojtari i Kosovës, shkoi te Mallorca atje ku gjendeshin edhe tre lojtarë të tjerë serbë. Por për Tovërlanin, problemi është Etnik Brruti që kaloi te Shqipëria. Dhe për ta mbyllur, Tovërlani e quan të turpshme sesi Etniku kaloi te një Kombëtare e cila po organizon Europianin me Serbinë. Pra nga sot e tutje, në Kosovë do t’i kërkojnë lojtarëve që të mos kalojnë në një shtet që po organizojnë Europianin me Serbinë, duke e trajtuar Shqipërinë si armiqësore. /Sport Ekspres/