Kosova mund të preket nga tarifat e paralajmëruara ndaj mallrave të BE-së

Tarifat e paralajmëruara nga administrata e re Trump ndaj mallrave të Bashkimit Evropian, vlerësohen se rrezikojnë t’i prekin edhe bizneset në Kosovë.

Tarifat e paralajmëruara nga administrata e re Trump ndaj mallrave të Bashkimit Evropian, vlerësohen se rrezikojnë t’i prekin edhe bizneset në Kosovë.

Kështu të paktën thonë përfaqësues të këtyre bizneseve, të cilët shtojnë se kompanive të shumta vendore që eksportojnë mallrat e tyre në SHBA e shtetet e Bashkimit Evropian, mund t’u rritet kostoja e prodhimit.

Lulzim Rafuna, kryetar i Odës Ekonomike të Kosovës, tha për RTK se në mënyrë indirekte do të prek edhe Kosovën, sepse sipas tij dihet që Kosova është e varur prej tregut evropian.

Po ashtu edhe Kushtrim Ahmeti, koordinator në Dhomën e Tregtisë dhe Industrisë, tha se Kosova rrezikon të preket për shkak siç tha ai e kemi ekonomin e brishtë dhe se çdo rritje e taksave ka ndikim negativ.

Në rast se bizneseve u rritet kostoja, vlerësohet se mund të rriten edhe çmimet për konsumatorët.

Përveç këtyre tarifave, përfaqësues të bizneseve ngrisin shqetësime se rrezikojnë të dëmtohen edhe nga planet e Uashingtonit për ndërprerjen e ndihmave financiare.

Kurse sipas Agim Shahini, kryetar i Aleancës Kosovare të Biznesit, tarifat do të kenë ndikim sepse jemi shoqëri importuese, konsumuese të prodhimeve të huaja.

Eksportet e Kosovës në vendet e BE-së në janar të këtij viti kanë shkuar në mbi 22 milionë euro.

Përveç vendeve të BE-së, partner i rëndësishëm për eksport për vendin është edhe SHBA-ja.

Së fundmi administrata e re Trump ka kërkuar që tarifat mbi produktet e Bashkimit Evropian të shkojnë në rreth 25%, teksa është paralajmëruar edhe ndalja e ndihmave financiare për vendet e huaja.