Turizmi po nxit çeljen e njësive akomoduese/ 9.57 mln euro investim për hotelet e reja që priten të ndërtohen

Zhvillimi i shpejtë dhe i qëndrueshëm i turizmit po krijon mundësi të reja dhe po nxit gjithnjë e më shumë individët të angazhohen në iniciativa që lidhen drejtpërdrejt me këtë sektor.

Shumë prej tyre janë të motivuar të investojnë në hapjen e bizneseve, sidomos në strukturat akomoduese, siç janë hotelet, që luajnë një rol të rëndësishëm në mbështetje të këtij zhvillimi.

Sipas të dhënave të fundit nga Instituti i Statistikave, gjatë 3-mujorit të tretë të vitit, janë dhënë gjithsej 12 leje ndërtimi për hotele dhe struktura të ngjashme, një tregues i qartë i ritmeve të rritjes së këtij sektori.

Sipas shifrave të INSTAT, sipërfaqja totale që do të mbulojnë këto 12 leje ndërtimi është afërsisht 26 mijë metra katror, një vlerë që tregon një tendencë të qartë rritjeje në këtë fushë.

Në krahasim me të njëjtën periudhë të vitit të kaluar, kjo sipërfaqe ka pësuar një rritje të konsiderueshme, duke arritur një shtesë prej rreth 16 mijë metrash katrorë, që përfaqëson një rritje më të madhe se trefishimin e sipërfaqes të përdorur për ndërtimin e hoteleve të reja.

Nga ana tjetër, vlera e investimeve që pritet të shpenzohet për ngritjen e këtyre 12 hoteleve të reja, të cilat tashmë kanë marrë lejen përkatëse për ndërtim, përllogaritet të arrijë në një total prej 9.57 milionë euro.

Krahasuar me të njëjtin 3-mujor të vitit të kaluar, shuma e investimeve ka njohur një rritje të dukshme prej 5.3 milionë euro, duke shënuar një rritje më të madhe se dyfishimi i vlerës së investimeve.