Uashingtoni i tregon “muskujt” Moskës, trupat e NATO-s dhe SHBA-së zbarkojnë në Shqipëri për stërvitjen më të madhe ushtarake në Europë
Me agresionin e paprecedent rus në Ukrainë që vijon prej më shumë se 1 viti, Amerika po i tregon muskujt presidentit rus, Vladimir Putin dhe këtë zgjedh ta bëjë në Ballkan, aty ky Moska prej kohësh po investohet për të rritur ndikimin e saj dhe destabilizuar vende të ndryshme që nuk pajtohen me politikat e saj. Kështu, gazeta “SOT” ka mësuar se për herë të dytë, Shqipëria do të mirëpresë stërvitjen më të madhe ushtarake në Evropë. Stërvitja nis me 22 maj dhe ka qenë ministri i Mbrojtjes, Niko Peleshi i cili ka ndarë dje disa pamje nga forcat e NATO dhe SHBA. Peleshi shkruan se Shqipëria, si partner i besueshëm dhe si nyje strategjike e sigurisë rajonale, do të luajë një rol kyç në këtë stërvitje të rëndësishme ‘Defender Europe 23’ është stërvitja më e madhja ushtarake që pret Shqipëria si aleate e NATO-s, me pjesëmarrjen e rreth 17 mijë trupave shumëkombëshe. “Nis stërvitja e përbashkët shumëkombëshe drejtuar nga Komanda Europiane e SHBA, ku do të demonstrohen aftësitë ndërvepruese të Shteteve të Bashkuara me ushtritë aleate dhe partnere të NATO-s. Shqipëria, si partner i besueshëm dhe si nyje strategjike e sigurisë rajonale, do të luajë një rol kyç në këtë stërvitje të rëndësishme. Krenarë për këtë rol, duke treguar mbështetjen dhe angazhimin tonë maksimal për të gjithë ushtarakët dhe personelin që janë pjesë e këtij misioni të rëndësishëm. Bashkëpunimi dhe mbështetja jonë, thelbësore për paqen dhe stabilitetin në rajon”, shkruan Peleshi.
Ja kur do mbahet stërvitja
“Defender Europe 23 zhvillohet nga data 22 maj deri më 23 qershor. Stërvitja përfshin më shumë se 7,000 anëtarë të shërbimit të SHBA dhe 17,000 trupa shumëkombëshe nga më shumë se 20 vende aleate dhe partnere. Stërvitja do të ushtrojë aftësinë e Ushtrisë Amerikane në Evropë dhe Afrikë për të shërbyer si Komandë e Bashkuar e Komponentit të Forcës Tokësore, dhe si partner i sigurisë në rajonet me rëndësi strategjike të Ballkanit dhe të Detit të Zi, ndërsa mbështet aktivitetet në Evropën Veriore dhe Afrikë. Për nisjen e kësaj stërvitjeje do të ketë edhe një aktivitet hapës, ku do të marrin pjesë kryeministri Edi Rama, presidenti Bajram Begaj, ministri i Mbrojtjes Niko Peleshi dhe ambasadorja amerikane, Yuri Kim. Kujtojmë që të njëjtën stërvitje Shqipëria e priti edhe dy vite më parë. Asokohe ambasadorja e Shteteve të Bashkuara të Amerikës, Yuri Kim, në fjalën e saj të rastit në ceremoninë e nisjes së stërvitjes ‘Defender Europe 21’, tha se SHBA nuk do t’i harrojë kurrë sakrificat e shqiptarëve në luftë krah për krah amerikanëve. “Dua t’i uroj mirëseardhjen gjeneralëve, 3 gjeneralë amerikanë 4 yje mblidhen në të njëjtën kohë në të njëjtin vend. Prania juaj konfirmon që roli i Shqipërisë në aleancë vetëm rritet. Shqipëria është pritëse e më shumë aktiviteteve se çdo vend tjetër në rajon. Kjo nuk është rastësi. Shqiptarët kanë luftuar përkrah nesh krah për krah. Ne kurrë nuk do t’i harrojmë sakrificat tuaja. E njohim trimërinë tuaj dhe jemi të nderuar t’ju kemi në aleancë. Përgëzojmë vullnetin e Shqipërisë për të marrë përgjegjësi. Ju kurrë nuk keni hezituar për të ndihmuar. Na keni përsëritur gjithmonë dhe na keni treguar potencialin taktik dhe strategjik në Shqipëri. Kjo stërvitje është historike. Jemi gjithmonë krah për krah jush, tani, nesër e përgjithmonë”, deklaroi ambasadorja Yuri Kim.
