📸 Përurohet parkingu publik në qendër të Beratit. Kryebashkiaku Demo: Qytetin e pret një dallgë e jashtëzakonshme zhvillimi!
Kryetari i Bashkisë së Beratit, Ervin Demo, inauguroi parkingun e ri në qendër të qytetit. Projekti, një ndër më madhorët në qytetin e Beratit, ka një kapacitet prej mbi 200 mjetesh dhe i jep një frymëmarrje të rëndësishme lehtësimit të trafikut në qytet.
Parkingu nëntokësor te sheshi “Teodor Muzaka”, është vepra më madhore që ndikon drejtpërdrejt në jetën e qytetarëve, në aksesin e qytetit nga turistët dhe lehtëson ndjeshëm trafikun dhe është hapur sot në mëngjes për të gjithë banorët e Beratit.
Parkingu do të testohet dhe deri sa të gjithë të familjarizohen me të, çdo qytetar mund të parkojë aty pa pagesë.
Kryetari i bashkisë tha se ky është vetëm një nga shumë projektet madhore që do të ndodhin në Berat për ta kthyer këtë qytet aty ku e meriton.
“Ne do të kemi një dallgë të jashtëzakonshme për zhvillimin e Beratit dhe më besoni që vitet që kemi përpara do të jenë vitet e kthesës që Berati do të mbahet mend në gjithë Shqipërinë”, u shpreh Demo.
Kryebashkiaku i dha një mesazh edhe kundër-kandidatit të tij, i cili ka dalë kundër këtij projekti. Demo tha se bashkia i ka kursyer taksapaguesve rreth 150 mijë dollarë duke e hartuar vetë projektin dhe ka bërë një punë të jashtëzkonshme për ta siguruar atë te Fondi Shqiptar i Zhvillimit. Demo tha se kundërshtarët e duan Beratin si vegël për luftë politike.
“Ky parkim është treguesi më i mirë që në qoftë se ne këmbëngulim, në qoftë se ne nuk shpërqëndrohemi nga zhurmat e pafundme, të cilat vijnë nga ata që nuk e duan Beratin shumë por e shikojnë Beratin si një vegël që thjesht mund të luajnë dhe nuk e shohin si një qytet që jo vetëm ka një të ardhme të jashtëzakonshme, por mbi të gjitha duhet të ndërtohet për brezat që ne kemi përpara”.
Parkingu nëntokësor gjendet poshtë sheshit kryesor të qytetit dhe është pjesë e rikualifikimit të qendrës ku do të shtohet edhe një shesh tjetër i ri, ai i bashkëjetesës fetare, një project që e kthen qytetin në identitet.
Parkingu nëntokësor do të shërbejë edhe për evente të ndryshme kulturore dhe artistike, që kohët e fundit janë shtuar shumë në qytetin e një mbi një dritareve.
