Profil/ Fytyra e panjohur e Radoiçiçit, që i priu terroristëve serbë

Brenda Milan Radoiçiçit, njeriut që akuzohet nga autoritetet kosovare, se qëndronte në krye të sulmit të 24 shtatorit në Banjskë, nga ku mbeti i vrarë një polic kosovar, fshihen njëkohësisht shumë fytyra.

Edhe biznesmen i madh edhe bandit kontrabandist; edhe zv/kryetar i partisë Lista Serbska edhe i dyshuar për vrasjen e politikanit Oliver Ivanoviç; edhe investitor në rrugë, ndërtim, apo hoteleri edhe i shpallur në listën e zezë të SHBA dhe Britanisë; edhe hero për serbët e veriut edhe kriminel për shqiptarët. Pas sulmit terrorist mbi policinë Ministri i Brendshëm i Kosovës, Xhelal Sveçla deklaroi se gjatë sekuestrimit të arsenalit të armëve të kapura janë gjetur dokumente të Milan Radoiçiç. “Kjo është lista e armëve apo lejeve zyrtare të institucioneve të Serbisë Radoiçiçit, ku janë edhe armët të cilat ai posedon”, tha Sveçla para gazetarëve.

Ndërkohë që një media boshnjake, ‘Istraga”, raportonte në platformën X se ai ishte plagosur gjatë shkëmbimit të zjarrit me policët shqiptarë dhe ndodhej në Serbi duke u kuruar, ministria e Brendëshme Kosovës botoi një foto (e madhe lart) ku pretendohej se ai gjendej në krye të trupave brenda manastirit në Banjskë të Zveçanit. Ishte apo s’ishte? Ka hyrë në Kosovë apo, ka arritur të dalë prej saj? ka hetuar dritë hijet e këtij momenti që janë ato të krejt jetës së këtij 45 vjeçari të lindur në Gjakovë, që u bë i njohur në skenën publike këtu e dhjetë vite më parë.

Nga nacionalistët serbë Radoiçiçi përveçse si mbrojtës i tyre në veri të Kosovës, ai njihet edhe si njeriu që ka biznese të përbashkëta me një tjetër kriminel dhe kontrabandist kontrovers, Zvonko Vesellinoviçin nga Zveçani. Shpesh kamionët që bllokojnë rrugët në veri dyshohet se janë pjesë e flotës prej 32 makinash të tonazhit të rëndë, që ata u akuzuan se i rrëmbyen forcërisht nga kompania “Hipo Alpe Adria Lizing. Ata janë bashkëpronarë firmës së ndërtimit, INKOP, si dhe posedojnë një hotel në stacionin ‘IN” të skijimit serb në Kopaonik.

Përveçse si një njeri i parave, me kalimin e viteve Radioiçiçi ka imponuar edhe një profil politik. Ai është zgjedhur nënkryetar i Listës Serbe pak muaj pas vrasjes së politikanit serb nga Kosova, Oliver Ivanoviç, më 2018. Ai është akuzuar se ka gisht në këtë vrasje, por këto dyshime nuk janë vërtetuar dot në rrugë gjyqësore. Personalisht ai e ka përshkruar akuzën e autoriteteve të Kosovës ndaj tij si deredhi shqiptare për ta eleminuar politikisht.
“… sepse e di se unë, së bashku me miqtë e mi dhe vëllezërit e mi, jemi ndër të paktët që mund t’i kundërshtojmë në synimet e tyre për të nëpërkëmbur dhe përvetësuar veriun e Kosovës e Metohisë dhe për të nënshtruar popullin serb”, ka deklaruar Radoijçiçi. Pjesmarrijen e tij në vrasjen e politikanit serb të Kosovës, Ivanoviç e ka mohuar me gojën e tij edhe vetë presidenti Aleksandar Vuçiç. Në vitin 2018, ai i doli në mbrojtje Radojçiqit gjatë një interviste në televizionin publik duke i mohuar akuzat në drejtim të tij. “Milan Radojçiçi, natyrisht, s’është akademik, as piktor, as shkrimtar. Pikërisht për këtë, dhe për disa gjëra të tjera ai s’mund të jetë krenar. Për to as ne s’jemi të lumtur, por ama, ai gjithmonë është në vijën e parë të mbrojtjes në Mitrovicën e Veriut,” – tha atëherë Vuçiçi që e konsideroi si “njeriun numër një” për mbrojtjen e Veriut të Kosovës.

Dyshimet e përfshirjes së tij në vepra kriminale kanë bërë që ai të jetë një i kërkuar i përhershëm i organeve ligjzbatuese të Kosovës. Pas akuzave për vrasje, mbi të kanë rënduar edhe ato për friksim dëshmitarësh në aferën e ndërtimeve pa leje në malin dhe stacionin e skive në Brezovicë.
Por deri me tani Radoijçiçi ka ditur te shpetoje. Ai i ka bërë të tijat hyrje daljet klandestine në kufirin që ndan Kosovën me Serbinë. Në shkurt 2022, ai i dredhoi policisë në pikën kufitare në Bërnjak.

ka raportuar se në korrik, ai u rifut sërish në mënyrë ilegale dhe përmes një video-mesazhi, proklamoi se serbët e dinë se çfarë do të thotë për ta kthimi i tij në Kosovë.
Pikërisht për këto arsye emri i tij ka shkaktuar shpesh grindje mes krahve të politikës shqiptare në Prishtinë që e akuzojnë njëra tjetrën për flirtim me këtë biznesmen, politikan me profil kriminal. E fundit në radhë që u përball me këto akuza ishte kryetarja e grupit parlamentar të Vetëvendosjes, Mimoza Kusari – Lila. Ajo dëgjohej gjatë një bisede të përgjuar, të transmetuar nga Nacionale.com të fliste me politikanin e anatemuar. Ngjarja bëri shumë bujë sepse kur ishte në opozitë Vetëvendosja i kishte masakruar verbalisht pushtatarët që qenë takuar me Radoiçiçin. Më 2017, mediat raportuan se Radoiçiçi ishte takuar me kryetarin e partisë Aleanca Kosova e Re (AKR) Behxhet Pacolli, në një jaht luksoz në Mal të Zi. Më 2018, kryeministri i atëhershëm, Ramush Haradinaj, e priti atë në zyrat e qeverisë. Haradinaj deklaroi se ata janë takuar sebashku edhe me ish presidentin Hashim Thaçi, ama përpara se ai të qe shpallur në kërkim nga autoritetet e Kosovës.

Edhe vetë Radoiçiçi i ka pranuar këto kontakte gjatë një interviste për Klan Kosovën në mars të vitit 2019.
Por, që kur ai u shpall në listën e zezë të SHBA-së gjithçka ka ndryshuar. Në dhjetor të vitit 2021, Departamenti amerikan i Thesarit e sanksionoi Radoiçiçin, bashkë me partnerin e tij në krim dhe biznes, Zvonko Vesellinoviçin.
Ata të dy, së bashku me dhjetë persona të tjerë, akuzoheshin si prijësit e një grupi të organizuar kriminal, që merrej me kondrabandimin e armëve, korruptimin e zyrtarëve dhe tregtinë e paligjshme të mallrave, parave dhe narkotikëve ndërmjet Kosovës dhe Serbisë.
Një pjesë të këtyre armëve, madje dhe municione të rënda, Radoijçiçi, mund ti ketë shpënë edhe në Banjskë, nëse ashtu sikurse pretendojnë autoritetet e Kosovës, ai ishte teroristi që i priu njësitit me 30 vetë që kishte planifikuar një aksion kriminal.

©