Luis Hasa, talenti i Juventus nuk i përgjigjet ftesave të kuqezinjve: FSHF publikon faktet

Jo të gjithë e ndjejnë njësoj kombësinë, apo në rastin e futbollit, fanellën e kombëtares. Gjatë viteve kemi patur jo pak raste, kur lojtarët kanë preferuar kombëtare më prestigjoze se ajo e Shqipërisë. E ndoshta në këtë kategori bën pjesë edhe Luis Hasa, talenti shqiptar i Juventus, që hesht para ftesave të Federatës Shqiptare të Futbollit.

FSHF është fokusuar në rritjen, zhvillimin dhe monitorimin e talenteve brenda dhe jashtë territorit të Shqipërisë. Është e qartë se kjo është mënyra e vetme për të pasur skuadra kombëtare sa më cilësorë dhe konkuruese. Në këtë kuadër, këtë javë ka filluar edhe projekti “Hap pas Hapi” nga Departamenti Teknik. Në fokusin e tij është puna individuale me të gjithë lojtarët e ekipeve kombëtare të moshave që luajnë brenda vendit për t’i rritur ato në të gjithë elementët fizik-teknik-taktik por edhe në aspekt ekipor.

Në të njëjtën kohë, prej vitesh FSHF ka ngritur një rrjet të madh skautësh. Qëllimi është për të evidentuar dhe ndjekur nga afër lojtarët e talentuar shqiptar që luajnë kudo nëpër botë. Ky rrjet skautësh, që rritet dhe zgjerohet muaj pas muaji, sinjalizon Departamentin e Ekipeve Kombëtare për elementët më të spikatur të cilët më pas ftohen nga ekipet tona nga U-15 deri te ekipi Kombëtar A.

FSHF PUBLIKON FAKSIN

Edhe Luis Hasa nuk mund të mbetej jashtë këtij fokusi, por sqarimi i bërë nga FSHF për të nuk është shumë shpresëdhënës për ta parë me fanellën kuqezi. “Ne e kemi bërë dhe e bëjmë gjithmonë ftesën tonë publike, për çdo shqiptar që dëshiron të luajë me fanellën e Shqipërisë. Nuk kishte sesi të mungonte një ftesë edhe për një talent të madh si Luis Hasa. Hasa ka qënë vazhdimisht pjesë e monitorimit të stafeve tona teknike dhe është ftuar për herë të fundit zyrtarisht më 18 maj 2022. Kjo shikohet në shkresën drejtuar klubit të Juventusit, i ftuar për të luajtur me Shqipërinë U-21 në ndeshjet zyrtare ndaj Anglisë dhe Kosovës”.

Lojtari megjithëse vazhdon të jetë në planet e FSHF që e mban “derën hapur jo vetëm për Luis Hasën, por për çdo talent shqiptar që e ndjen fanellën kuqezi”, nuk është pozicionuar hapur akoma. Në këtë pikë, Federatës i mbetet vetëm të “respektojmë zgjedhjen e tij gjithmonë dhe e mbështesim në rrugëtimin e tij profesional”.