“Kemi ekonomi të lartë informale”, eksperti: Ndërtimi, i parapëlqyer për pastrimin e parave

Konsulenti për rrezikun e pastrimit të parave, Dritan Vakaj për nxjerrjen e Shqipërisë nga lista gri e rrezikut për pastrimin e parave, thotë se problem mbetet ende zbatimi i rekomandimeve.

Duke folur për “MCN Economy”, ai deklaroi se Shqipëria e ka afruar legjislacionin, por se ne çalojmë tek zbatimi.

Sipas tij, pasuritë e paluajtshme janë parajsa e pastrimit të parave pasi konsiderohet si investim i sigurt dhe ngriti shqetësimin se jemi vend me ekonomi të lartë informale.

Mbikëqyrja nga FATF nuk është vetëm te 40 rekomandime, por te rezultatet imediate.

Lidhur me rezultatet ne kemi pasur një progres të moderuar, për të mos folur që nga këto rezultate të pritshme i kemi pasur në nivel të ulët.

Ndërtimi është një lloj investimi i parapëlqyer në nivel botëror për pastrimin e parave. Është një nga investimet më të sigurta.

Rritja e vlerës së pronës ka ndodhur në afatgjatë. Kemi dhe një lloj investimi që nuk kërkon ndonjë formim apo kualifikim të caktuar.

Shikohen si investime më të sigurta dhe më të lehta për të investuar. Është një treg relativisht i pëlqyer kudo.

Mundësia për ta ndikuar çmimin e pasurive të paluajtshme është relativisht e ulët.

Britania e Madhe është qendra e pastrimit të parave, kjo edhe prej faktit se sa më i madh është numri i transaksioneve bankare që kryhen, aq më i madh është rreziku.

Ndaj dhe Anglia është ekspozuar në mënyrë të ndjeshme ndaj rreziku i pastrimit të parave.

Në Shqipëri fokusohemi te vepra penale dhe jo te produktet e pastrimit të parave, edhe pse vitet e fundit janë shtuar goditjet në këtë drejtim.

Trajtimi i pasurive të paluajtshme në të gjitha vendet është konsideruar me risk të lartë për pastrimin e parave.

Në vendet e pazhvilluara personat juridik përdoren masivisht për pastrim parash.

Problem janë edhe blerjet me para në dorë në ndërtim. Jemi një vend ku kemi ekonomi të lartë informale.

Kemi raste ku investitorë strategjikë kanë përfunduar në burg dhe janë hetuar edhe për pastrimin e parave.