Zbardhen të tjera dëshmi të shqiptarit që vrau shokun në Selanik: Kohët e fundit më kishte kërcënuar

Autori 45-vjeçar i vrasjes makabre të mikut të tij 50-vjeçar, në lindje të Selanikut është akuzuar për vrasje dhe armëmbajtje pa leje. Ai do të qëndrojë në paraburgim deri në pritje të vendimit, sipas mediave greke.

Sipas informacioneve, 45-vjeçari me origjinë nga Shqipëria pretendon se ishte shok me viktimën dhe se mes tyre kishte pasur një sherr. Shkak i sherrit dyshohet se kanë qenë çështje financiare që kanë të bëjnë me viktimën dhe autorin.

Viktima dhe 45-vjeçari, me precedentë penalë, njiheshin me njëri-tjetrin. Madje, një përleshje çoi në incidentin e përgjakshëm dhe sulmin me të shtëna.

“Kohët e fundit jam kërcënuar me jetë nga viktima. Ka pasur dy incidente të dhunshme ndaj meje nga viktima dhe jashtë karburantit jam sulmuar sërish”, tha ai.

Autori, i cili u dorëzua pasditen e së premtes, rreth orës 16:30, në prani të avokatit të tij, Thanasis Alexopoulos, ka treguar në polici se ku e kishte lënë makinën që po drejtonte mesditën e së enjtes dhe ku e kishte lënë armën me të cilën ka vrarë viktimën.

Sipas informacioneve, i akuzuari ka hematoma dhe të nxira në kokë nga sulmi që ka marrë nga viktima me send jashtë karburantit dhe për këtë është urdhëruar ekspertiza.

Ngjarja e përgjakshme ka ndodhur në orën 12.35 të së enjtes jashtë një karburanti në rrugën Solonos 51. Sapo 50-vjeçari ka ndaluar makinën në pikën e karburantit, autori e ka ndjekur me automjetin e zi që drejtonte dhe ka ndaluar, pa dalë jashtë.

Dy burrat filluan të debatonin dhe viktima iu afrua vrasësit. Në videon tronditëse të regjistruar nga kamerat e sigurisë së karburantit, shihet momenti kur 50-vjeçari i afrohet sulmuesit dhe tenton ta godasë nga dritarja e pasagjerit dhe më pas e qëllon për vdekje.

Viktima, sipas informacioneve, ka marrë të paktën tre plumba në shpatull dhe gjoks duke rezultuar fatal për të.