Stërvitja me PK-në e EULEX-in, KFOR: U demonstrua aftësi për t’u përgjigjur ndaj skenarëve të ndryshëm

Misioni i NATO-s në Kosovë, KFOR, ai i BE-së, EULEX dhe Policia e Kosovës zhvilluan stërvitje të përbashkët.

KFOR-i thotë sot se stërvitja “Golden Saber 2024” “demonstroi një aftësi të zgjeruar për të kryer detyra të përbashkëta në përgjigje ndaj skenarëve të ndryshëm të sigurisë”.

Komandanti i KFOR-it, gjeneralmajor Ozkan Ulutas, ka thënë se përfundimi i kësaj stërvitjeje paraqet një moment historik të rëndësishëm në bashkëpunimin afatgjatë ndërmjet këtyre tri entiteteve drejt sigurisë së qëndrueshme në mbarë Kosovën.

Sipas tij, angazhimi i KFOR-it për të kontribuar në stabilitetin rajonal është i palëkundur.

“Angazhimi ynë për të kontribuar në stabilitetin rajonal është i palëkundur. Së bashku do të vazhdojmë të japim kontributin tonë drejt një të ardhmeje të sigurt dhe stabile për të gjithë njerëzit që jetojnë në Kosovë”, tha komandanti i KFOR-it.