PS bojkoton komisionin hetimor, Vokshi: Të shkarkohen anëtarët. Opozita depoziton planin hetimor për koncensionet

Kryetarja e Komisionit Hetimor për koncesionet e sterilizimit dhe check-up në Shëndetësi, Albana Vokshi ka akuzuar mazhorancën se nuk ka vullnet për të hetuar dhe se për të tretën herë kanë bojkotuar mbledhjen.

Në një deklaratë për mediat, Vokshi i bëri thirrje kryetares së Kuvendit Lindita Nikolla që të bëjë zëvendësimin e anëtarëve të PS, ndërsa kërkoi që Plarent Ndreca dhe Milva Ikonomi të largohen pasi janë në konflikt interesi lidhur me hetimin e këtyre dy koncesioneve.

Për vakshin bojkotimi i PS ndodh me urdhër të kryeministrit Rama, asi nuk dëshiron që të ketë hetime lidhur me koncesionin e sterilizimit dhe check-up në Shëndetësi.

“Përsëri deputetët e bojkotuan për herë të 3 radhazi komisionin hetimor pavarësisht se njoftimet për mbledhjen janë kryer në bazë të rregullores me kërkesë të opozitës. Është e qëllimshme ashtu sikurse refuzuan në mënyrë të përsëritur dhe po vijojnë refuzimin e të drejtave kushtetuese të opozitës në komisionin hetimor pro ën një formë tjetër. E kanë ngritur komisionin për ta dështuar, për ta bllokuar. Çdo mbledhje bojkotohet nga ana e mazhorancës se s’duan që të zbardhen aferat korruptive kriminale në Shqipëri, check up dhe sterilizimi. 7 deputetët të opozitës me firma kanë thirrur mbledhjen e Komisionit. Prania e deputetëve të mazhorancës sot është e detyrueshme, nuk zgjedhin nuk duhet të zgjedhin. Neni 32 pika 2 e detyron. Neni 12 pika 1i ligjit që e kanë ndryshuar vetë në mënyrë të njëanshme thotë mbledhjet thirren dhe vetëdrejtohen nga kryetari. E kam thirrur mbledhjen bazuar në ligj dhe për herë të tretë e kanë dështuar. Mazhorancë që bojkoton është vetëm kjo. Me urdhër të Ramës ata po bojkotojnë punimet dhe hetimet parlamentare. Kanë shkelur rregulloren, Kushtetutën dhe e kanë bojkotuar për arsye të papërligjura.  Plarent Ndreca si nënkryetar është provokim i hapur që i bëhet opozitës pasi ai është në konflikt të hapur interesi. Ai ka qenë avokat i disa prej personave që janë në akuzë nga SPKA për këto dy koncesioni që po hetohet. Edhe Milva Ikonomi është në konflikt të hapur interesi pasi ka drejtuar objektet e punës për dy koncesionet pasi  ka qenë në pozicionin e zv.ministres. Ajo nuk mund të hetojë veten e saj. I bëj thirrje Lindita Nikollës të bëj zëvendësimin e personave pasi nuk mund të jenë pjesë e koncesionit hetimor”, tha Vokshi.

Gjithashtu komisioni hetimor ka depozituar pranë Kuvendit planin hetimor të dy koncesioneve. Ky plan hetimor është përpiluar nga dy ekspertët e caktuar nga opozita Meri Lika dhe Franci Nuri, të cilët kanë kërkuar edhe shtyrje të afateve të dorëzimit të kërkesave për informacion.

Kjo shtyrje afatesh për kryetaren e komisionit është bërë për shkak të vonesave që janë shkaktuar nga bojkotimi i mazhorancës së komisionit hetimor në Shëndetësi.

Në planin e dorëzuar sipas ekspertëve mbledhja e dokumentacionit dhe kërkesat për informim duhen bërë brenda datës 15 prill, ndërsa shqyrtimi paraprak i këtij dokumentacioni duhet bërë deri më 20 prill.

Këto afate janë shtyrë nga ekspertët e caktuar nga opozita në mënyrë që të ketë kohë mjaftueshme për të pyetur ë gjithë dëshmitarët deri më 10 qershor.

/a.r