Video/ Partizani në shtesë të fik, Keko dënon Teutën në të 92′: Abilaliaj bën tre fitore në tre

E pësoi në kohën shtesë Tirana e Erzeni nga Mensah e tani edhe Teuta. Vetëm se këtë herë ndëshkuesi ishte Keko, në minutën e 92′ në golin e parë në kampionat. 0-1 imponohen të kuqtë në transfertën me Teutën, për javën e 10 të Superiores. Drejtori Sportiv Arbër Abilaliaj bën tre fitore në tre ndeshje në pankinë, të treja të vendosura në kohën shtesë.

Një ndeshje e komplikuar ajo me Teutën, me të cilën të kuqtë u ndeshën për herë të parë, duke qenë se debutimi mes tyre është shtyrë dhe nuk është rikuperuar ende. Ndoshta edhe për këtë fakt skuadrat ishin tepër të kujdesshme dhe në fazë studimi, për të mos u gjendur të papërgatitur. Ndeshja pati pak emocione në pjesën e parë, edhe pse Teuta mund të kishte ndryshuar fatin e ndeshjes në penalltinë e fituar. Fili dështoi të shënonte kundër ish-skuadrës së tij, duke falur Partizanin.

Të kuqtë, në pjesën e dytë, ndryshuan ritëm dhe shtynë përpara. Nëse ndeshje shkoi deri në minutën e 92′ pa ndryshuar rezultatin, merita ishte e portierit Dema. Me ndërhyrjet e tij ai ndali të gjitha tentativat e kryeqytetasve. Por pikërisht kur mendohej se Teuta e Partizanin do të ndanin një pikë, Keko shpiku një goditje nga jashtë zonës duke shënuar golin e fitores. Goli i parë për sulmuesin e ardhur nga Korabi dhe tre pikë për ekipin kryeqytetas. Me këtë ecuri, nën drejtimin e drejtorit Abilaliaj, presidenti Dema mund të vazhdojë të marrë kohë për trajnerin e ri. Për sa kohë ndeshjet kanë shtesë.