“Favorizoi të afërmin në tender”, SPAK mbyll hetimet për Lefter Allën, ish-kryebashkiaku merret i pandehur

Prokuroria e Posaçme përfundon hetimin dhe çon për gjykim dosjen për ish-kryebashkiakun e Bulqizës, Lefter Alla dhe 10 personave të tjerë, ish-zyrtarë dhe biznesmenë.

Alla është marrë i pandehur për “shkelje të barazisë në tenderë” dhe “shpërdorim të detyrës”.

Sipas SPAK, Lefter Alla evidentohet se ka shkelur procedurat e prokurimit publik të 30 prillit 2021 për ndërtimin e rrjetit të furnizimit dhe të shpërndarës së ujësjellës-kanalizimeve, në Lagjen e Vjetër të qytetit të Bulqizës.

Ish-kryebashkiaku së bashku me zyrtarë të tjerë përgjegjës të bashkisë kanë krijuar avantazhe gjatë procedurës së prokurimit në mënyrë që garën ta fitonte kompania që donin ata, që drejtohej nga një i afërm i Allës.

Tre vjet më parë, Alla u hetua nga SPAK për “prodhim dhe mbajtje të lëndeve narkotike”, hetim që nisi pas publikimit të një videoje, ku pretendohej se shfaqej ish-kryebashkiaku duke konsumuar kokainë.

Në kuadër të hetimit, Alla iu nënshtrua dhe testit të drogës, prej nga rezultoi se nuk ishte përdorues i lëndëve narkotike dhe më pas hetimi i nisur u pushua.

/a.r