Albi Doka humbet kthimin ndaj Besiktas: testet evidentojnë problemin muskulor për mbrojtësin

Rezultati 3-1 është vetë i komplikuar për tu përmbysur, sidomos duke patur parasysh nivelin e Besiktas. Pastaj kur shtohen probleme të tjera, bëhet akoma më e vështirë. Rezultatet që kanë ardhur nga testet të cilave iu nënshtrua Albi Doka, pas kthimit nga Stambolli, nuk janë aspak ato që priste tekniku i bardhebluve Orges Shehi.

Mbrojtësi i djathtë ka pësuar një lodhje muskulare, që do ta pengojë të dalë në fushë për ndeshjen e kthimit kundër gjigantit turk. Rekomandimi është 4 ditë pushim i plotë për mbrojtësin Doka. Në këtë pikë, për 26 vjeçarin prezenca në ndeshjen e së enjtes në Arena Kombëtare është e pamundur. Doka doli nga fusha në Vodafone Park, në transfertën e vajtjes, në minutën e 58’. Lojtari ndjeu një pickim në muskul, që nuk e lejonte dot të vazhdonte ndeshjen. 26 vjecari u zëvendësua nga Rimal Haxhiu.

Sipas të gjitha gjasave, ai do të jetë edhe padroni i krahut të djathtë në ndeshjen e kthimit kundër Besiktas. Haxhiu në fakt bëri një paraqitje të mirë, duke u futur në tonus në fushë dhe duke dhënë një kontribut të rëndësishëm edhe përpara. I tij ishte asisti i golit të vetëm të Kaina Nunes në minutën e 83, në një nga daljet e zakonshme ofensive të mbrojtësit. Tani, Shehi pret të njëjtin intensitet dhe dëshirë prej tij edhe në kthim, për të luajtur shanset e pakta deri në fund. Tirana e provoi në Stamboll. Për fraksione loje dha përshtypjen edhe se mund ta përballonte. Por pastaj diferencat me Besiktas janë ato që janë, ato u shfaqën e ato që diheshin.

GABIMET PËR T’U EVITUAR

Tirana u dënua vërtetë nga kualiteti i lojtarëve që kishte përballë, por u braktis, gjë që nuk e priste, nga lojtarët që duhet të ishin ata të eksperiencës. Selmani u dëshpërua kur pësoi golin e tretë, me topin që i shpëtoi nga duart, por në fakt problemi ishte i të gjithë repartit. Në një situatë 5 kundër 2, Kilicsoy u lejua të afrohej me topin në këmbë, të futej në driblim, të dilte në konkluzion e pastaj portieri të bënte gabimin e fundit.

Edhe në rastin e golit të parë, Përgjoni humbi kohën, në lojtarin që mbulonte dhe Bulut e kishte një lojë fëmijësh të hapte ndeshjen. Pa harruar se edhe në golin e dytë të turqve, portieri Selmani nuk ishte i pakapshëm. Gabime individuale e mungesë forme që dihej më parë, ashtu si fakti se ishte shumë e vështirë të luhej si një skuadër, një grup lojtarësh bashkë prej pak kohësh.