“Klani grek” i SPAK dhe alibia e “klaneve socialiste” të SPAK

Nga Mero Baze

Fredi Beleri mund edhe të mos fliste për zhvillimet e reja rreth çështjes së ish-ministres Xhaçka në GJKKO. Ashtu siç e tha dhe vetë, ai e ka bërë dy vite më parë kallëzimin dhe atëherë e kishte premtim elektoral. Alibia se goditja e Xhaçkës është luftë e klaneve politike të PS-së brenda SPAK është një alibi e dobët. Në të vërtetë, nëse ka një njeri që e ka përdorur SPAK-un më shumë për hakmarrje ndaj asaj që i ka ndodhur vetë atij (fillimisht jo nga SPAK), është Fredi Beleri.

Kur u arrestua Fredi Beleri në flagrancë për vjedhje votash, kam bërë një editorial ku e kam kundërshtuar arrestimin e tij tre ditë para zgjedhjeve, pasi jo vetëm do ta ndihmonte, por do të dobësonte edhe provat – pasi deri të dielën mund të kishte zhvillime të tjera. Por, duke mos qenë shumë i informuar kush e bëri arrestimin, mendova se, duke qenë detyrë e SPAK-ut, e kishte bërë SPAK-u.

https://www.gazetatema.net/editorial/prokuroria-ka-hyre-himare-si-nje-elefant-ne-dyqan-qelqurinash-i389866

Sapo u botua artikulli, reagoi zyra e zotit Dumani dhe më thanë që nuk është arrestim nga SPAK, por nga Prokuroria e Vlorës, dhe nëse nuk e ndryshoj, do të bënin përgënjeshtrim.

U thashë mund ta bënin përgënjeshtrimin, por ndërkohë po e sqaroj që nuk ishte bërë nga SPAK, edhe pse ishte detyrë e SPAK-ut.

Pastaj çështja, për shkak të juridiksionit, kaloi në SPAK një javë më vonë. Por ama nuk e filloi SPAK çështjen ndaj tij. E filloi Prokuroria e Vlorës dhe SPAK-ut i ngelën patatet e nxehta në duar. Kështu që SPAK nuk ka pasur asnjë vullnet për t’u marrë me Belerin dhe thjesht ka çuar në gjykatë një dosje që ia ka bërë Prokuroria e Vlorës.

Ajo që SPAK bëri për të vënë në vend “nderin” e Belerit ishte shumë më e madhe.

Prokurori Olsi Dado arrestoi rivalin e Belerit, Jorgo Goro, pas kallëzimit nga burgu të Belerit, pasi ai – si kryetar bashkie – kishte konfirmuar një tapi nga ato të ligjit 7501, që kishte krijuar mbivendosje. Detyra e kryetarit të bashkisë në këtë procedurë është tërësisht formale dhe burokratike, dhe jo thelbësore, pasi ai nuk merr detyrën të shkojë të masë tokat që ka ndarë Këshilli Popullor i fshatit, por vetëm thotë a është apo jo kjo tapi në arkivën e Bashkisë.

Kështu mund të arrestosh çdo kryetar komune dhe bashkie në Shqipëri.

Hetimi ndaj Goros ishte një monstruozitet i kërkuar qartë për hakmarrje ndaj Belerit. Ishte një akuzë e shkruar greqisht dhe përkthyer në shqip, edhe pse Dado mund ta lexonte dhe direkt në origjinal. Asnjë vepër korruptive dhe asnjë shkelje ligji thelbësore nuk ka në akuzën ndaj tij, përveç hakmarrjes për të kënaqur Belerin dhe klanin politik e etnik që qëndron pas tij. Dhe kjo është e provueshme sot e 100 vite më vonë.

Po kaq e provueshme është se i njëjti klan politik dhe etnik, e njëjta frymë hakmarrjeje, qëndron pas vendimit të gjyqtares Flora Haredinaj ndaj Olta Xhaçkës.

Zonja në fjalë, për të cilën Beleri do të na mbushë mendjen që është klan i PS-së, është në fakt kunata e Xhemal Gjunkshit, kandidat i Partisë Demokratike për deputet në Dibër dhe ish-deputet i Berishës.

Konflikti i interesit është edhe më i pastër, pasi Xhaçka dhe Gjunkshi janë përplasur më 2017 në Dibër dhe ai ka bërë kallëzim ndaj saj për probleme të fushatës elektorale. Dhe tani ka përdorur kunatën për të marrë hak. Nuk e di që kur Gjunkshi punon për klanet e PS-së, por më lehtë e ka të punojë për klanet e koalicionit Berisha-Beleri, nga Athina deri në Himarë.

Jo aq rastësisht zonja Xhaçka është njeriu më i urryer në mediat greke, për shkak të ndërprerjes së negociatave për detin që kishte mbyllur Berisha më 2009 në favor të Greqisë, dhe pastaj për hapjen e bazës së NATO-s në Kuçovë, pasi hapësira ajrore e Shqipërisë në NATO mbulohet nga Greqia dhe disa episode të tjera, siç ka qenë debati për bustin e Sali Butkës në Kolonjë, apo ngritja e çështjes çame gjatë vizitës së Dendias në Tiranë, kur ia përmendi Himarën.

E thënë qartë: Xhaçka është bërë një dele e zezë për Greqinë, për shkak të detyrës së saj.

Fakti që kunata e deputetit të PD-së “urdhëron” një prokuror me plot merita për kauzat e PD-së, që deri tani ka futur në burg pa prova tre kryetarë bashkie të PS-së, Fran Tucin e Fushë Arrëzit se ka ndihmuar fshatarët të bejnë një rrugë për në fshat, Jorgo Goron, se i ka prishur terezine Belerit dhe Erion Veliaj, se ështe sjellë keq në burg dhe ka folur në telefon me gruan për mua. Tani ështe e tepërt ta bëni “pis” Olsin e ta akuzoni se bën lojën e klaneve brenda PS-së.

Këtë lojën që “prokurori i thotë gjykatës: ma kërko me vendim”, e kemi parë edhe tek çështje të tjera, kur u skadojnë afatet dhe duan t’i nisin nga e para.

Ndaj, Belerit i binte më mirë të mos fliste në këtë rast.

Ai, natyrisht, ka dashur të marrë hak – dhe mund ta shijonte hakmarrjen edhe në heshtje, pasi drejtësia e re ja ka plotësuar të gjitha dëshirat.

Nuk ka pse të trembet që po i zbulohet klani “grek” në SPAK, apo GJKKO, pasi nuk e maskon dot me “klanet” brenda PS-së. Brenda PS-së ka plot klane, madje të ndyra, por nuk ka asnjë klan të “Agimit të Artë”. Në SPAK dhe GJKKO, duket se po.