“Kosovës i dhamë 2 milionë $”, Trump flet për fondet e USAID për ashkalitë e egjiptianët –

Trump përmend Kosovën për herë të parë pas betimit si President. Lideri amerikan megjithatë iu referua vetëm si një nga vendet që ka marrë fonde nga USAID, të cilat administrata e tij tashmë po i vlerëson si shpenzime të pajustifikuara apo shpërdorim të buxhetit.

Në konferencën e mbajtur në Florida, Trump theksoi se dy milionë dollarë nga USAID-i në Kosovë janë dedikuar për zhvillimin e “modeleve të qëndrueshme të riciklimit” që synojnë “rritje të kohezionit socio-ekonomik” në vend.

“2 milionë dollarë për zhvillimin e modeleve të qëndrueshme të riciklimit për të rritur kohezionin socio-ekonomik në mesin e komuniteteve të margjinalizuara në Kosovë, si romët, ashkalitë dhe egjiptianët”, tha Donald Trump.

Gjatë fjalës së tij, Trump përmendi edhe Serbinë, e cila ka marrë 14 milionë dollarë për përmirësimin e prokurimeve publike. Lista e gjatë e Donald Trump përfshinte një numër vendesh të cilat kanë përfituar para nga Shtetet e Bashkuara të Amerikës. Me marrjen e detyrës, Presidenti Trump urdhëroi një pauzë 90-ditore të ndihmës për zhvillimin e huaj, duke bërë thirrje për verifikimin e efektivitetit dhe konsistencës së saj me politikën e jashtme.

“Të gjithë drejtuesit e departamenteve dhe agjencive përgjegjëse për programet amerikane të ndihmës së huaj zhvillimore duhet të ndalojnë menjëherë angazhimet dhe pagesat e fondeve të ndihmës për zhvillim”, thuhet në vendimin e Trump.

Një zëdhënës i USAID tha për mediat ndërkombëtare pak ditë më parë se të gjitha programet dhe grantet pa masa përjashtuese ishin pezulluar.