B4Students dhe “Skill Up Academy”: Aktivitete që transformojnë studentë në liderë

Fondacioni Mane vijon të kontribuojë në arsim dhe edukim, për një brez të motivuar dhe të përgatitur për sfidat e së ardhmes. Përmes programit B4Students dhe projektit të tij fitues, “Skill Up Academy”, po realizohen një cikël takimesh me figura të spikatur publike nga ku studentë të interesuar bëhen pjesë e një bashkëbisedimi të frytshëm, ku ndahen përvoja personale si shembuj më të mirë të suksesit. “Skill Up Academy” është i hapur për të gjithë studentët, pavarësisht drejtimit të tyre akademik, dhe ka për qëllim zhvillimin e aftësive jetësore dhe krijimin e mundësive të reja për të rinjtë.

Aktiviteti i fundit i projektit u drejtua nga politikania dhe lektorja Grida Duma, e cila trajtoi temën e diskutimit “Mendësia”, si çelës për hapjen e shumë dyerve në jetë. Me mbi 380 studentë të pranishëm në Amfiteatrin e Universitetit të Mjekësisë, Duma ndau përvojat e saj dhe nxiti një diskutim të hapur mbi ndikimin e mendësisë në arritjen e qëllimeve. Pjesëmarrësit shfaqën interes për të mësuar dhe zhvilluar mendësinë e duhur, për të kapërcyer pengesat që mund të hasin në jetën e tyre profesionale dhe personale.

Pak ditë më parë, “Skill Up Academy” organizoi një tjetër aktivitet mbi “Logjikën e parasë” , me lektorin dhe studiuesin e ri, Igli Tola, i cili i trajtoi praktikat financiare nën një perspektivë ndryshe.

Aktiviteti që startoi të gjithë rrugëtimin e “Skill Up Academy” u drejtua nga gazetari i njohur Marin Mema, i cili foli mbi temën “Lideri i së ardhmes”. Gjatë këtij sesioni, u diskutua se si lidershipi mund të formësojë botën e nesërme dhe si të rinjtë mund të përgatiten për të udhëhequr me ndikim. Pjesëmarrësit, shfaqën dëshirë për të kuptuar më mirë karakteristikat dhe strategjitë e liderëve të suksesshëm.

“Skill Up Academy” është një iniciativë që përputhet me misionin e B4Students për të fuqizuar projektet sociale të udhëhequra nga studentët; është krijuar nga studentët Armelda Ago, Armando Lekaj dhe Esmeralda Sherifi, dhe ka për qëllim ofrimin e aftësive të nevojshme jetësore dhe njohurive praktike për studentët, që të jenë të përgatitur për sukses në botën e shpejtë dhe dinamike të sotme.

Aktivitetet e “Skill Up Academy” përfshijnë organizimin e bashkëbisedimeve me tema të rëndësishme për edukimin dhe zhvillimin e përgjithshëm të studentëve, duke përfshirë krahas temave të trajtuara dhe ato si “Inteligjenca emocionale” apo “Balanca punë -jetë”.

“Skill Up Academy” është iniciativa e pestë që merr mbështetje dhe financim nga B4Students.