“Ja ku jam!”, Berisha pas 11 muajsh në Kuvend: Vij fitimtar, Rama tentoi të rikthente vitin ’46

“Ja ku jam, vij fitimtar”, kanë qenë këto fjalët e para pas 11 muajsh mungesë në Parlament, të kreut demokrat Sali Berisha.

Ky i fundit, në një fjalë të gjatë nga foltorja e Kuvendit, ka dhënë mesazhe të qarta dhe ka artikuluar akuza të forta kundrejt kryeministrit Edi Rama, të cilin e akuzon për arrestin shtëpiak të tij për 11 muaj.

Berisha deklaroi se Kryeministri Rama kërkoi të nderonte kujtimin e diktatorit Enver Hoxha për të eleminuar opozitën në Shqipëri.

“Më 21 dhjetor të 2023-shit, Edi Rama mendoi se realizoi ëndrrën e tij që të mos shihte më në këtë sallë Sali Berishën, të Shqipërisë pa opozitën.

Në një vendim që zgjati 8 minuta, me pasion e histeri të madhe, gjysma prej jush atë ditë tentuan të varrosë demokracinë, pluralizmin në Shqipëri.

Votuat duke mohuar të drejtën e fjalës pasi fjala ime tmerronte narkodiktatorin dhe shumë prej jush. Votuat duke mbushur Parlamentin me mbi 50 gardistë. Rikujtuat në këtë mënyrë se ishte dhjetor i ’46-ës,Enver Hoxha vendosi të eleminojë opozitën e Shqipërisë. Rama për të nderuar kujtimin e tij zgjodhi dhjetorin për të larguar Berishën nga Parlamenti, për ta arrestuar pa asnjë fakt e provë.

Mirëpo, i bëtë llogaritë të gabuar, sepse nuk ishte viti ’46. Ju kishit mbështetjen e atyre që ishin larguar nga parimet e mëdha të lirisë së SHBA dhe ndiqnin agjendën e Sorros.

Sot JA KU JAM! Unë vij këtu me mesazhin e fitores, vij fitimtar, për të udhëhequr opozitën drejt fitores”, deklaroi Berisha.

/a.r