Aeroplanmbajtësja turke ‘Anadolu’ në detin Jon, i bashkohet fregata greke ‘AGEON’, ja arsyeja

Helikoptermbajtësja turke “TCG Anadolu” është larguar nga Egjeu dhe Mesdheu Lindor duke u nisur të enjten për në Detin Jon, ku do t’i bashkohet luftëanijes së Marinës italiane, “ITS Cavour” dhe shoqërueseve të saj në kuadër të stërvitjes gjithpërfshirëse të NATO-s, “Neptun Strike 24-2”.

Stërvitja e madhe aeronautike dhe detare e Aleancës po zhvillohet njëkohësisht në Mesdhe dhe në Detin e Veriut, me praninë e një numri të madh anijesh luftarake, përfshirë aeroplanmbajtësen USS Harry Truman, e cila do të jetë flamuri udhëheqës i grupit të Zjarrit që do të vendoset në Europë.

Aeroplanmbajtësja italiane “Cavour” së bashku me turken “Anadolu” do të kenë një rol përkatës në Mesdhe, ndërsa Shtabi i NATO-s do të drejtojë armatën detare nga anija e komandës dhe kontrollit USS “Mount Whitney”.

Grupi Sulmues Mesdhetar përfshin ndër të tjera anijen Amfibe me shumë qëllime USS “Wasp” si dhe Anijen Amfibe Sulmuese USS “Oak Hill”, e cila do të transportojë forcat amfibe.

Sipas dizajnit të stërvitjes, “Anadolu” do të veprojë edhe si njësi amfibe me shumë qëllime, pasi përveç helikopterëve Bayraktar dhe dronëve pa pilot, mban edhe një batalion marinsash.

Ndërkohë, pjesë e të njëjtit mision do të jetë edhe marina e Greqisë, me fregatën “AGEON” , ndërsa në stërvitje do të marrin pjesë edhe luftëtarë të Forcave Ajrore helene. Me shumë gjasë do të jenë avionët F-16 nga krahu i 116-të luftarak në Araxos ata që do t’i bashkohen stërvitjes.

Megjithatë, një parametër interesant i stërvitjes do të jetë skenari i sulmit të luftëtarëve të FSH-së që synojnë armadën detare, të cilës i përket edhe aeroplanmbajtësja turke “Anadolu”.

Është hera e dytë në vitin 2024 që anija turke niset për në detin Jon, pasi edhe prillin e kaluar mori pjesë në stërvitjen “Neptun Strike 24.1”, së bashku me fregatën TCG “Salih Reis” dhe korvetën TCG “Byuykada”.

Me praninë e “Anadolu” në stërvitjet aleate dhe stërvitjet e përbashkëta, Turqia po përpiqet të marrë një rol të forcuar brenda NATO-s dhe të dërgojë mesazhin se është forca detare më e fuqishme në rajon në krahasim me Greqinë. Ndërtimi i kësaj aeroplanmbajtëse tregoi se Ankaraja synon të zgjerojë praninë e saj detare në rajonin më të gjerë, ndërkohë që Forca Detare turke do të pasurohet edhe me nëndetëset e para 214 të klasit “Piri Reis”, që korrespondojnë në kapacitete me klasin grek “PAPANIKOLIS” .

Majin e kaluar, “TCG Anadolu” mori pjesë në stërvitjen më të madhe të aviacionit të Turqisë “Deniz Kurdu”, e cila u zhvillua në Egje, Mesdheun Lindor, Detin Marmara dhe Detin e Zi.

TCG “Anadolu” është flamurtari i flotës turke dhe Ankaraja e reklamon vazhdimisht. Ajo ka aftësinë të transportojë gjithsej 12 helikopterë të përmasave të mesme në hangarët e saj. Përveç kësaj, mund të ngarkohet me automjete të lehta, si dhe me automjete të blinduara dhe t’i bashkohet operacioneve amfibe.

“TCG Anadolu” gjithashtu mund të mbajë deri në 46 tanke Leopard. Si një mjet lundrues amfib me shumë qëllime, ajo ka aftësinë të transportojë një Batalion Amfib të pajisur plotësisht, i cili në “Neptun Strike 24” do të përbëhet nga marinsat.

/a.r