Vitet e para pas diplomimit duhet të punojnë në Shqipëri/ Me 73 vota pro, mazhoranca miraton ligjin për studentët e mjekësisë

Deputetët e mazhorancës kanë miratuar sot në seancën plenare me 73 vota pro, 0 kundër dhe 0 abstenim, projektligjin për punën e detyruar të studentëve të mjekësisë, konkretisht “Për një shtesë dhe disa ndryshime në ligjin nr. 60/2023, “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme”, në institucionet publike të arsimit të lartë”.

Seanca e sotme nisi me një minutë heshtje në nder dhe kujtim të ish-deputetit të PD Gerti Bogdani, i cili u nda nga jeta një ditë më parë, ndërsa më pas vijuan diskutimet.

Deputetët e opozitës nuk morën pjesë, pasi u larguan pas nderimeve të Bogdanit, sikundër njoftuan dhe një ditë më parë, për pezullim të çdo aktiviteti politik për ditën e sotme.