Hamasi thotë se bisedimet e armëpushimit në Gaza duhet të bazohen në planin e Bidenit

Hamasi ka thënë se çdo rifillim i bisedimeve të armëpushimit për konfliktin në Gaza duhet të bazohet në planet e mëparshme dhe jo në mbajtjen e raundeve të reja të negociatave.

Javën e kaluar, ndërmjetësuesit ndërkombëtarë nga Katari, Egjipti dhe SHBA-të i kërkuan Izraelit dhe Hamasit të merrnin pjesë në negociatat për një armëpushim dhe marrëveshje për lirimin e pengjeve më 15 gusht.

Izraeli u përgjigj të enjten, duke thënë se do të dërgonte një ekip negociatorësh për të marrë pjesë në takim. Negociatat dështuan muajin e kaluar, pasi kushtet e reja u prezantuan në kornizën e paraqitur nga Presidenti i SHBA Joe Biden në maj, raporton BBC.

Të hënën, udhëheqësit e Mbretërisë së Bashkuar, Francës dhe Gjermanisë lëshuan një thirrje të përbashkët për rifillimin e bisedimeve, duke thënë se “nuk mund të ketë vonesa të mëtejshme”.

Kryeministri i Mbretërisë së Bashkuar Keir Starmer, presidenti francez Emmanuel Macron dhe kancelari gjerman Olaf Scholz i bënë jehonë thirrjes së ndërmjetësve për rifillimin e bisedimeve të armëpushimit në një deklaratë të përbashkët.

“Ne pajtohemi që nuk mund të ketë vonesa të mëtejshme”, thuhet në deklaratë.

“Ne kemi punuar me të gjitha palët për të parandaluar përshkallëzimin dhe nuk do të kursejmë asnjë përpjekje për të ulur tensionet dhe për të gjetur një rrugë drejt stabilitetit.”

Vendet kërkuan gjithashtu për uljen e tensioneve në Lindjen e Mesme – të cilat janë rritur që nga vrasja e anëtarëve të lartë të Hamasit dhe Hezbollahut.

Sekretari amerikan i Mbrojtjes Lloyd Austin konfirmoi të dielën mbrëma se ai kishte urdhëruar vendosjen e një nëndetëse me raketa të drejtuar në Lindjen e Mesme, e cila do t’i bashkohet aeroplanmbajtëses USS Abraham Lincoln, e cila po shkon në rajon.

Irani tha më parë se do t’i përgjigjet vrasjes së liderit të Hamasit Ismail Haniyeh në “kohën e duhur” në mënyrën “e duhur” dhe se SHBA-ja mban përgjegjësi për vdekjen e tij për shkak të mbështetjes së saj.

Në një deklaratë në lidhje me bisedimet e armëpushimit, Hamasi iu përgjigj presionit të ndërmjetësuesve duke bërë thirrje për hartimin e një plani bazuar në “vizionin” e zotit Biden nga maji – në thelb duke rënë dakord për të rifilluar negociatat nga pika ku u ndalën dhe jo nga ndonjë nismë e re.