Marine Le Pen nisi turneun e saj të fushatës elektorale

Tubimi Kombëtar i Francës së ekstremit të djathtë (RN) nisi turneun e fushatës elektorale duke negociuar me aleatët për të formuar një ekip që mund të drejtojë qeverinë nëse ajo fiton zgjedhjet e parakohshme, duke sjellë përfaqësues nga radhët e saj dhe më gjerë.

Sondazhet parashikojnë se ‘Tubimi Kombëtar’ i Le Pen për herë të parë mund të kryesojë votat e 30 Qershorit dhe 7 Korrikut, por pa vende të mjaftueshme për të fituar një shumicë absolute dhe për të qeverisur vetë.

Zgjedhjet e parakohshme, të thirrura nga presidenti Emmanuel Macron pasi aleanca e tij centriste u mposht nga partia ‘Tubimi Kombëtar’ në zgjedhjet e Parlamentit Evropian, kanë përmbysur politikën franceze, me partitë që nxitojnë të paraqesin kandidatë dhe të përgatisin platforma. Për ‘Tubimin Kombëtar’ anti-emigracion, euroskeptik, sfida është të transformojë popullaritetin në një fitore në shtëpi dhe të bindë votuesit se mund t’i besohet të qeverisë pas dekadash.

“Ne kemi mundësinë t’i fitojmë këto zgjedhje, të krijojmë një qeveri të unitetit kombëtar me. Duhet ta nxjerrim Francën nga kjo gropë. I bëj thirrje të gjithë francezëve që të vijnë të na ndihmojnë, për vendin, të dërgojmë në pushtet një ekip që do ta shpëtojë Francën deri në zgjedhjet e ardhshme.”

Partia “Tubimi Kombëtar” është mbajtur jashtë pushtetit për dekada nga votuesit që nuk kanë besim tek e djathta ekstreme dhe politikat e saj radikale. Por nën Le Pen dhe udhëheqësin e ri të partisë Jordan Bardella, ata kanë punuar për të ringritur imazhin e tyre dhe për të tërhequr një numër në rritje të votuesve në të gjithë bordin.

Ndërkaq Partitë politike, duke përfshirë socialistët, të gjelbrit, komunistët do të formojnë një “Front Popullor” në një përpjekje për të sfiduar ‘Tubimin Kombëtar’ të ekstremit të djathtë, ndërsa janë zotuar për një qëndrim të qartë për Gazën dhe Ukrainën.

Megjithëse shanset e ‘Frontit Popullor’ për të fituar zgjedhjet janë të pakta sipas sondazheve, por ata mund të sigurojnë vota për të penguar kampin e Macron dhe Le Pen të arrijnë një shumicë qeverisëse të qëndrueshme.