Arijon Ibrahimovic me “mundësi të dytë” te Bayerni

Pas një periudhe të suksesshme si huazim në klubin Italian Frosinone, Arijon Ibrahimovic pritet të ketë një “mundësi të dytë” tek Bayern Munchen në sezonin e ri.

Sipas “Kicker”, klubi bavarez nuk dëshiron ta lejojë 18-vjeçarin të largohet në një huazim tjetër, me Ibrahimovicin që pritet të ketë minuta në skuadrën e Vincent Kompany.

Që nga ardhja e Kompany, planifikimi i skuadrës për sezonin e ardhshëm veçse ka nisur.

Siç raporton “Kicker”, belgu ka shpalosur idenë e tij te drejtuesit e klubit, e cila është të promovojë dhe të integrojë më shumë lojtarë të rinj në ekipin e parë, si rasti i Ibrahimovic.

Mesfushori-sulmues shkëlqeu në pjesën e parë të sezonit, mirëpo pati probleme me lëndime në gjysmën e dytë të edicionit të kaluar.

Por, me paraqitjet e tij, ai fitoi lëvdata nga CEO i Frosinones, Guido Angelozzi, i cili tha se ai do të jetë e ardhmja e Bayernit.

“Ai është shumë i talentuar dhe jam i bindur që ai do të gdhendë një vend të rëndësishëm në vitet e ardhshme në Bayern”, tha Angelozzi për “Kicker”.

Bayerni beson se Ibrahimovic tashmë është pjekur si lojtar, dhe se përvoja në Itali i ka bërë shumë mirë, duke përjetuar një kulturë dhe një gjuhë krejtësisht tjetër.

Ibrahimovic ka edhe nënshtetësinë e Kosovës krahas asaj të Gjermanisë, gjersa ka pasur interesim për të, si nga Kosova, ashtu edhe nga Shqipëria.

Por, për momentin, 18-vjeçari është reprezentues i Gjermanisë U19, ndërsa mbetet të shihet se çfarë vendimi do të marrë në të ardhmen.