Pse Blinken vjen në Tiranë? Analisti: Jemi të vetmit partnerë të SHBA në Ballkan…!

Analisti Ilir Yzeiri ishte këtë të hënë i ftuar në Euronews Albania ku tha se është e kuptueshme që Blinken të vijë e të vizitojë Tiranën.

Sipas tij Shqipëria është partneri më i fortë i Shteteve të Bashkuara të Amerikës, ndaj edhe vizita do të bëhet pikërisht në Tiranë, pasi në vende të tjera nuk ka të njëjtën mbështetje. Ai tha se amerikanët e vlerësojnë shumë këtë partneritet me Shqipërinë pasi u duhet për politikën e tyre në botë.

“Nuk kanë amerikanët në Ballkan asnjë partner tjetër veç shqiptarëve, ku do shkojë në Serbi, në Bosnjë Hercegovinë apo në Maqedoni? shqiptarët janë me fat që kanë qëlluar në krah të amerikanëve dhe amerikanët e vlerësojnë këtë partneritet.

Atyre u duhet për politikën e tyre globale, ndërsa ne na duhet një mik i tillë që është në një farë mënyre garancia e sigurisë sot në botë. Sido që të venë punët në shtetet e Bashkuara të Amerikës, cilido që mund të zgjidhet nesër, realiteti i SHBA-së me Shqipërinë nuk ka për të ndryshuar kurrë”,-tha analisti./m.j