Emrat/ Talat Xhaferri kryeministër dhe plot ministra shqiptarë, qeveria maqedonase pritet të krijohet nga një kabinet historik

Njëri prej figurave kryesore politike në Maqedoninë Veriore, Artan Grubi ka dhënë lajmin e madh. Ai ka treguar se për herë të parë do të formohet një kabinet historik në qeverinë maqedonase, me Talat Xhaferin kryeministër e me plot ministra shqiptarë.

“Krenar që bashkë me Fatmirin, Bujarin, Kreshnikun dhe Jetonin, si dhe Nazimin, Agimin dhe Bekimin, jemi propozuar si pjesë e Kabinetit historik të Kryeministrit të parë shqiptar, Talat Xhaferi, nën udhëheqjen misionare dhe vizionare të rilindasit të fundit të kombit shqiptar, ALI AHMETI.  Kur guxuam, ia dolëm, kur ëndërruam, realizuam, kur besuam, punuam, kur u tha, u bë!”, ka shkruar ai.

Kujtojmë që të dielën Kuvendi do të zgjedh Qeverinë Teknike me mandatar Talat Xhaferin. Mandati i saj do jetë 100 ditë, ndërsa detyra e këtij formati të organit ekzekutiv është përgatitja e vendit për zgjedhjet parlamentare të 8 majit. Roli dhe kompetencat e kryeministrit teknik i cili buroi si ide e negociatave të “Përzhinës” në vitin 2015 është i kufizuar, përkatësisht është i cunguar nga fuqia ekzekutive. Ligji mbi Qeverinë përcakton kompetencat e organit ekzekutiv dhe të resorëve brenda saj, kryesisht të atyre që udhëhiqen nga opozita apo kanë zëvendësministra plotësues.

Pas marrjes së mandatit, Talat Xhaferi premtoi se e gjithë procedura për formimin e qeverisë teknike do të zhvillohet në bazë të ligjeve dhe Kushtetutës së vendit.

Zv/Kryeministër i Parë, sipas Marrëveshjes LSDM – BDI, do të jetë Bojan Mariçiq, i cili mbetet edhe Zv/Kryeministër për Çështje Evropiane.

Artan Grubi që kryente funksionin e Zv/Kryeministrit të Parë, do të jetë Ministër për Sistem Politik.

Opozitës i takojnë vendet ministrore në MPB dhe Ministrinë për Punë dhe Politikë Sociale dhe Zv/Ministra plotësues në Ministritë e Financave, për Shoqëri Informatike dhe Administratë dhe Bujqësi.

Në qeverinë teknike VMRO-DPMNE-ja ka propozuar Pançe Toshkovskin si kandidat për Ministër të Brendshëm Teknik, Gjoko Velkovskin, kandidat për Ministër Teknik për punë dhe politikë sociale, Elena Petrovën, kandidate për Zv/Ministre plotësuese për Financa, Cvetan Tripunovskin kandidat për Zv/Ministër plotësues për Bujqësi dhe Stefan Andonovskin Zv/Ministër plotësues për Shoqëri Informatike dhe Administratë.

Dihen edhe emrat e Ministrave dhe Zv/Ministrave plotësues nga radhët e LSDM-së. Mitko Bojmacaliev – shefi i Kabinetit të Oliver Spasovskit është kandidat për Zv/Ministër të Brendshëm plotësues. Në vendet ministrore në kulturë, ambient jetësor, transport, mbrojtje dhe bujqësi janë propozuar ministrat e deritashëm.

Për zv/Ministra plotësues nga LSDM-ja janë propozuar Viktorija Avramovska – Madiq në Ministrinë e Drejtësisë, Maja Manoleva në Ministrinë e Shëndetësisë, Aleksandar Bajdeski në Ministrinë për Shoqëri Informatike dhe Administratë, Filip Nikolovski në Ministrinë për Financa dhe Miki Krstev në Ministrinë për pushtet lokal dhe Jovana Trençevska në Ministrinë për Punë dhe Politikë Sociale.

Votimi për qeverinë teknike pritet të bëhet të dielën në seancë plenare. Nesër duhet të mbahet edhe seanca për zgjedhjen e Zv/Ministrave dhe Zv/Ministrave plotësues.

Procedurat që nisën me dorëheqjet e kryeministrit Kovaçevski dhe kryeparlamentarit Xhaferi paraqesin hyrje në procesin zgjedhor për zgjedhjet e pranverës në vend.

Më 8 maj krahas zgjedhjeve parlamentare, do të votohet edhe në rrethin e dytë të zgjedhjeve presidenciale. Rrethi i parë I presidencialeve do të mbahet më 24 prill.

Më poshtë, përbërja e re qeveritare e propozuar nga Xhaferi:

1. Slavjanka Petrovska, ministre që do të jetë në krye të Ministrisë së Mbrojtjes
2. Pançe Toshkovski, ministre që do të jetë në krye të MPB-së
3. Krenar Loga, ministër që do të drejtojë Ministrinë e Drejtësisë
4. Artan Grubi, ministër që do të drejtojë Ministrinë e Sistemit Politik dhe Marrëdhënieve Ndër-Komuniteteve
5. Bujar Osmani, ministër që do të menaxhojë Ministrinë e Punëve të Jashtme
6. Fatmir Besimi, ministër që do të menaxhojë Ministrinë e Financave
7. Kreshnik Bekteshi, ministër që do të menaxhojë Ministrinë e Ekonomisë
8. Ljupço Nikolovski, ministër që do të menaxhojë Ministrinë e Bujqësisë, Pylltarisë dhe Menaxhimit të Ujërave
9. Fatmir Mexhiti, ministër që do të drejtojë Ministrinë e Shëndetësisë,
10. Jeton Shaqiri, ministër që do ta drejtojë Ministrinë e Arsimit dhe Shkencës
11. Gjoko Velkovski, ministër që do të menaxhojë Ministrinë e Punës dhe Çështjeve Sociale
12. Risto Penov, ministër që do të drejtojë Ministrinë e Çështjeve të Vetëqeverisjes Lokale
13. Bisera Kostadinovska-Stojçevska, ministre që do të drejtojë Ministrinë e Kulturës
14. Azir Aliu, ministër që do të menaxhojë Ministrinë e Shoqërisë Informative dhe Administratës
15. Blagoj Boçvarski, ministër që do të menaxhojë Ministrinë e Transportit dhe Lidhjeve, dhe
16. Kaja Shukova, ministre që do të menaxhojë Ministrinë e Mjedisit dhe Planifikimit Hapësinor.

Për ministrat pa departament:

1. Bojan Mariçiq, ministër pa portofol i ngarkuar me çështje evropiane
2. Fatmir Bytyçi, ministër pa portofol i ngarkuar me çështje ekonomike, koordinim i portofoleve ekonomike dhe investimeve, dhe
3. Slavica Grkovska, ministre pa portofol përgjegjës për politikat për qeverisje të mirë./m.j