Në korrik niveli më i lartë i kredive të këqija për këtë vit, shkak edhe kriza e çmimeve

Qytetarët dhe bizneset nuk po i paguajnë kreditë në kohë. Kriza e çmimeve, normat e larta të interesit, por edhe pushimet verore po shtojnë ato që cilësohen si “kreditë e këqija”. Sipas Bankës së Shqipërisë vlera e huave të papaguara në kohë në raport me totalin u rrit në 5.28 për qind. Ky është niveli më i lartë i këtij viti.

“Kemi dy risqe. Nga njëra anë janë çmimet e shtrenjtuara dhe nga tjera shtrenjtimi i kësteve të kredisë si pasojë e normave të rritura të interesit. Të gjendura në vështirësi financiare, qytetarët detyrohen të mos paguajnë kreditë”, shprehet eksperti për ekonominë Enton Duro.

Të dhënat nga Banka Qendrore tregojnë se vlera e kredisë së papaguar në kohë në korrik arriti në 36.5 miliardë lekë, me kursin aktual të këmbimit rreth 341 milionë euro.

“Bizneset vuajnë nga mungesa e likuiditetit si pasojë e krizave. Kjo bën shpesh që ata të shkojnë në paaftësi për të shlyer këstet e kredive”, thekson Duro.

Të dhënat paraprake tregojnë se pjesa më e madhe e huave të papaguara në kohë janë në valutë. Ndërkohë Baka e Shqipërisë vlerëson se pavarësisht rritjes së lehtë të kredive të këqija, sektori financiar në vend vijon të jetë i shëndetshëm financiarisht.

/a.r