Deputeti i PD: Me fitoren e Trump, do hiqet ‘non grata’ e Berishës

Deputeti i Partisë Demokratike, Tritan Shehu, është shprehur se pas fitores së Donald Trump në zgjedhjet në SHBA, kryedemokratit Sali Berisha do i hiqet masa e ‘non gratës’.

Komentet Shehu i bëri në një lidhje në “Ditari i Fundjavës” me gazetarin Erion Dushi në A2 CNN, ku tha se nga administrata Trump pritet të bëhet një vlerësim i drejtë i çështjes së Berishës, dosja për të cilin sipas tij është bosh.

Ai tha gjithashtu se edhe personaliteteve të tjera të rëndësishme, kur kanë dalë të pafajshëm, i është hequr ‘non grata’, madje sipas tij janë marrë me avion dhe janë dërguar në zyrën Ovale në Shtëpinë e Bardhë.

“Dosja e Berishës në SHBA është një dosje bosh, siç e kanë thënë kongresmenë e senatorë amerikanë. Në dëgjimet që janë bërë. Asnjëherë nuk është paraqitur një dosje me fletë brenda. E kanë thënë personalitete amerikane të Partisë Republikane.

Ajo që kërkohet në këto raste është vlerësimi i çështjes me paanësi. Të jeni të bindur se një vlerësim i paanshëm dhe i drejtë e nxjerr Berishën të pafajshëm. Kur del e vërteta edhe masa e ‘non gratës’ bie poshtë.

Unë jam i bindur se kjo e vërtetë do të dalë. Është një dosje bosh. Unë nuk di kur ka nisur nisma, por di kur është shpallur nisma dhe nuk ka qenë Pompeu Sekretar Shteti në SHBA, por të tjerë. Nisma të tilla i janë hequr edhe personaliteteve të tjera. Madje janë marrë edhe me avionë dhe janë çuar në dhomën ovale të Shtëpisë së Bardhë ku ka dalë e vërteta”, tha Shehu.