Haradinaj: Kurti është futur thellë në agjendën e Serbisë, veprimet e tij të pakoordinuara me aleatët janë shkatërrimtare për Kosovën

Kreu i AAK-së, Ramush Haradinaj, ka thënë se veprimet e njëanshme e të pakoordinuara të Albin Kurtit me aleatët, janë shkatërrimtare për Kosovën, raporton Gazeta Blic.

Ai përmes një postimi në Facebook, ka thënë se politika e tij mund të rrezikojë edhe jetët e pjesëtarëve të NATO-s.

Sipas Haradinajt, Kurti është futur në agjendën e Serbisë e cila për t’i demonizuar shqiptarët i ka vrarë edhe fëmijët e vet në Panda të Pejës.

I pari i AAK-së ka thënë se Kosova ka zot dhe s’ka qeveri që mund ta kthejë prapa.

Postimi i tij i plotë:

Vendimet e njëanshme e të pakoordinuara të Albin Kurtit me aleatët, janë shkatërrimtare për Kosovën. Përpara se Albin Kurti ta “vrasë” dinarin serb në Kosovë, atë e ka vrarë Euro. Politika e tij populiste që mund të rrezikojë edhe jetët e pjesëtarëve të NATO-s, është sabotim e përpjekje për zhbërjen e shtetit.

Ky kryeministër është futur thellë në agjendën e Serbisë e cila për t’i demonizuar shqiptarët i ka vrarë edhe fëmijët e vet në Panda të Pejës. Po dyshoj nëse ky person, si shqiptari i vetëm i liruar nga burgu me dekret të Presidentit serb, Koshtunica, është duke i kryer obligimet që i ka marrë. Por, ia kujtoj atij e gjithë të tjerëve se Kosova ka zot dhe nuk ka qeveri të mund ta kthej mbrapa!