City mposht Newcastle në minutën e 90-të, Guardiola: “Ndonjëherë është më mirë të fitosh kështu”

Pas fitores kundër Newcastle që erdhi në minutën e fundit falë golit të të riut Bobb, trajneri i Manchester Cityt, Pep Guardiola foli për BBC, ku u shpreh shumë i lumtur me tre pikët dhe paraqitjen e lojtarëve.

“Ishte fantastike, ndonjëherë është më mirë të fitosh në këtë mënyrë për një ekip. Luajtëm me personalitet të jashtëzakonshëm. Skuadra më tregoi se ata donin të ishin këtu, të luftonin deri në fund për të qëndruar në luftën për titull”, tha fillimisht Guardiola.

Ai më pas u ndal për të folur në lidhje me De Bruyne, për të cilin tha se ka vetëm lëvdata.

“Jam i zemëruar me të sepse ai nuk shënoi nga një goditje e lirë (qesh). Kur lojtarët kundërshtarë janë të lodhur, lojtarët si Kevin ju japin një hap tjetër. Kur ai ka topin, ne mund t’i vendosim vrapuesit tanë në lëvizje, ai është një lojtar unik në botë, por edhe goli i shënuar nga Oscar Bobb është i bukur, jam shumë i lumtur për të”, përfundoi Pep Guardiola.

/ Sport