Suedia alarmohet pas paralajmërimeve për luftë
Paralajmërimi për suedezët nga dy zyrtarë të lartë të mbrojtjes për t’u përgatitur për luftë ka shkaktuar shqetësim dhe akuza.
Ministri i Mbrojtjes Civile, Carl-Oskar Bohlin, ka thënë në një konferencë se “mund të ketë luftë në Suedi”.
Mesazhi i tij u mbështet më pas nga komandanti i përgjithshëm ushtarak, gjeneral Micael Byden, i cili u shpreh se të gjithë suedezët duhet të përgatiten mendërisht për këtë mundësi.
Megjithatë, politikanët e opozitës kanë kundërshtuar tonin e paralajmërimeve, shkruan BBC të enjten.
Ish-kryeministrja Magdalena Andersson ka thënë se ndërsa situata e sigurisë ishte serioze, “nuk duket sikur lufta është te dera”.
Organizata për të drejtat e fëmijëve, “Bris”, ka thënë se linja e saj kombëtare e ndihmës zakonisht nuk merrte thirrje për mundësinë e luftës. Por këtë javë, kishte parë thirrje të shumta nga të rinjtë e shqetësuar që kishin parë raporte lajmesh ose postime në TikTok që flisnin për këtë.
Pavarësisht ashpërsisë së mesazheve, paralajmërimet e ministrit të Mbrojtjes Civile dhe shefit të ushtrisë po shihen si thirrje për zgjim.
Pas më shumë se dy shekujsh paqeje, Suedia është pak hapa nga anëtarësimi në aleancën mbrojtëse të NATO-s, duke pritur për dritë jeshile nga parlamenti i Turqisë dhe më pas nga Hungaria.
Komandanti i Përgjithshëm ka thënë se komentet e tij nuk ishin asgjë e re.
Ai vizitoi frontin lindor të Ukrainës një muaj më parë dhe Suedia është një nga vendet që trajnojnë pilotët ukrainas. Stokholmi thuhet gjithashtu se po shqyrton dërgimin e avionëve luftarakë të avancuar Gripen në Ukrainë.
Finlanda tashmë i është bashkuar NATO-s dhe zyrtarët rusë kanë sugjeruar se do të jetë “e para që do të vuajë” nëse tensionet me NATO-n përshkallëzohen.
#Suedia #alarmohet #pas #paralajmërimeve #për #luftë
gazetablic.com
