Pamjet nga sateliti/ Shikoni si është shkatërruar Gaza nga sulmet izraelite

Imazhet e reja satelitore në Gaza tregojnë shkallën e vërtetë të shkatërrimit të shkaktuar nga bombardimet intensive ajrore të Izraelit mbi këtë territor gjatë 3 javëve të fundit. Fotografitë, të publikuara nga Maxar Technologies, krahasojnë imazhet e kapura nga hapësira në fillim të kësaj jave me imazhet para fillimit të konfliktit.

Ato tregojnë tre zona në veri të Gazës, ku sulmet ajrore kanë lënë dhjetëra blloqe pallatesh të shkatërruara plotësisht ose të dëmtuara rëndë, si dhe zona të mëdha ndërtesash të kthyera në grumbuj rrënojash gri.

Beit Hanoun, një vendbanim në cepin veri-lindor të Gazës që është vetëm 2 km larg kufirit me Izraelin, është një zonë që tregohet se është prekur keq. Ushtria izraelite thotë se zona është një qendër për Hamasin dhe ishte një nga të parat ku Izraeli paralajmëroi banorët të largoheshin.

Zona e Beit Hanoun e paraqitur më poshtë ndodhet në rrugën kryesore për në pikën kufitare Erez. Disa ndërtesa shumëkatëshe që ishin të dukshme pak më shumë se dy javë më parë tani mezi po qëndrojnë në këmbë.

Ministria e strehimit e drejtuar nga Hamasi ka vlerësuar se rreth 45% e të gjitha njësive të banimit në territor janë shkatërruar plotësisht, janë bërë të pabanueshme ose janë të dëmtuara. Rreth 1.4 milionë njerëz janë të zhvendosur brenda vendit.

Mijëra palestinezë janë larguar nga shtëpitë e tyre nga veriu i Gazës, pasi ushtria izraelite iu tha të largoheshin për sigurinë e tyre, por disa janë kthyer në veri sepse sulme po kryhen edhe në jug.

Qyteti Al Karama, i paraqitur më poshtë, ndodhet në bregun verior të Gaza në detin Mesdhe. Zonat menjëherë pas rrugës kryesore bregdetare, ku ndodhen disa hotele, janë goditur nga sulmet izraelite.

Në Atatra, e cila është rreth 3 km në jug të kufirit izraelit, më shumë se 20 blloqe të larta dhe disa ndërtesa janë dëmtuar rëndë. Një objekt sportiv në jug të blloqeve të kullave, që shihet në imazhin më poshtë është mbuluar nga hiri gri i sulmeve. ©