VIDEO/ Portieri rri i shtangur në vend, e majta e Jasir Asanit prodhon një tjetër kryevepër në stërvitje

Pavarësisht se kemi kohë pa e shikuar një gol nga distanca të Jasir Asanit, që nga ato kualifikuese të mrekullueshme të Europianit të Gjermanisë, futbollisti shqiptar po përgatitet dita ditës dhe duket më në formë se kurrë për të përsëritur një mrekulli të tillë kundër Serbisë. Në fakt, Asanit do “t’i falej” e gjitha kjo thatësirë nëse përsërite një mrekulli të tillë me Serbinë.

Imagjinoni për një moment një gol kundër Serbisë dhe mbi të gjitha, një gol i çmendur nga ato që mund t’i nxjerrë vetëm repertori i Asanit. Aktualisht ky lojtar është duke u stërvitur te Gëangju dhe atje po shfaq cilësitë e tij, duke dëshmuar më së miri se është ende i aftë për të lënë portierin të shtangur nëse i lejohet hapësira për të goditur.

Në videon nga stërvitja e Asanit, tregohet një moment kur topi i goditur prej tij përfundon në traversë dhe më pas në rrjetë. Është një prej atyre goditjeve që nuk i lë asnjë shans portierit kundërshtar jo vetëm për të reaguar dhe për ta pritur goditjen, por as për t’u hedhur, ai qëndron i shtangur në vend.
?
Megjithatë mbetet të shihet sesi do të studiohet taktika e Silvinjos kundër Serbisë dhe formacioni që ai do të përdor, pasi në ndeshjen kundër Andorrës, në krahun e djathtë të sulmit ishte Armando Broja. E sigurt është që nëse do të ketë vend për të dy, pra edhe për Asanin dhe për Brojën, Silvinjo duhet të përgatis një skemë që të mundohet për t’i krijuar sa më shumë hapësira Brojës, por njëkohësisht t’i hap edhe pak hapësirë Asanit për të provuar goditjen nga distanca. Deri tani në ndeshjet e fundit, Asani ka qenë i izoluar dhe i markuar nga shumë kundërshtarë duke ditur aftësinë e tij, për të mos i lënë shansin që të gjuaj nga distanca e largët. /Sport Ekspres/