Lajm i fundit/ Dalin para gjykatës Rrajat e sulmit barbar në Krujë

Kanë dalë sot para Gjykatës, 4 nga persona e akuzuar të fisit Rraja për dhunën barbare ndaj 2 kushërinjve Maja në Krujë, 3 ditë më parë. Prokuroria ka kërkuar arrest me burg, një masë që do të vlerësohet nga Gjykata. Dy qytetarët Bilbil Maja dhe Jashar Maja u sulmuan me shkopin bejsbolli dhe armë nga anëtarë të fisit Rraja. Në dëshminë e tyre dy të dhunuarit kanë dhënë detaje për sulmin ndaj tyre.

“Kam shquar të hyjnë Xhemal dhe Flamur Rraja, të cilët kanë qenë të armatosur dhe më kanë kërkuar të shtrihem në tokë. Mes tyre kam shquar dhe pronarin e gurores. Flamur dhe Xhemal Rraja, vëllezërit e deputetit të PS-së Rrahman Rraja, më kanë goditur në kokë e trup. Dhe persona të tjerë, të afërm të tyre na kanë goditur pa pushim duke ana lënë pa ndjenja”, – ka deklaruar Bilbil Maja.

Në pranga është vënë edhe Kujtim Bërdaku, pronari i lokalit në Fushë Krujë ku ka ndodhur ngjarja i akuzuar se nuk e ka kallëzuar krimin dhe se ka kryer veprime për pengimin e së vërtetës duke mos siguruar për policinë pamjet DVR nga kamera e sigurisë. Policia reagoi vetëm pas publikimit në rrjetet sociale të pamjeve të xhiruara nga vetë Rrajat.

Bilbil Maja kishte denoncuar disa herë në polici për dëmtimet që po shkaktoheshin nga shpërthimet e gurores dhe kishte tentuar disa herë të bllokonin kamionët. Këtë të diel gurorja është mbyllur. ©