Kërcënimi i Ramës, nëse prekej inceneratori: Për tre ditë Tirana si Durrësi! (që u mbulua nga plehrat)

Në Dhjetor të vitit të kaluar, kur korrupsioni me inceneratorët kishte shpërthyer në të gjitha dimensionet e tij duke përfshirë nivelet më larta të qeverisjes, kryeministrit Edi Rama iu kërkua nga deputetët e opozitës në parlament të ndalte pagesat për inceneratorin e Tiranës. Miliona euro shkonin për djegie të mbetjeve dhe prodhim të energjisë, por në fakt inceneratori nuk ekzistonte. Çmimi 29 euro për ton kuptohej se ishte i fryrë në mënyrë të pajustifikuar, sepse groposja e mbetjeve kushtonte shumë më pak.

Lexo edhe: Durrësi i ‘mbytur’ nga plehrat, shpallet gjendja e Emergjencës Mjedisore

Si përgjigjej Rama? Kryeministri kërcënonte me një skenar të lënies së plehrave në rrugë, të ngjashëm me atë që ndodhi në Durrës, para se bashkia të vendoste me urgjencë dërgimin e plehrave tek inceneratori i Tiranës.

“Kushton mbajtja pastër e Tiranës. Një nga gjërat që ma kanë thënë të tërë ata që erdhën për samitin, me në krye kryeministren e Italisë ishte “Tirana është befasisht e pastër”. Doni të bëjmë një provë? Por këtë provë nuk e bëjmë dot se është në kurriz të publikut. Doni të bëjmë një provë? Të ndalojmë pagesat për tre ditë dhe të shikoni pastaj se çfarë ndodh me Tiranën? Sepse atje ndodh një operacion i përditshëm i grumbullimit dhe i trajtimit të mbetjeve. Nëse ky operacion i përditshëm ndalon, ne vijmë në situatën që ishim në Durrës në fillim të verës së shkuar. Dhe unë nuk besoj se ka ndonjë qytetar të Tiranës, qoftë edhe ballist, që të thotë: Ta bëjmë! Nuk ma ha mendja! është shërbim zotëri! Paguhet shërbimi” u shpreh Rama në atë kohë.

Mbetet për t’u parë nëse ky skenar i paprecedent i paralajmëruar nga kryeministri do të jetë përgjigjia për vendimin e SPAK që sekuestroi inceneratorin fantazëm të Tiranës dhe ka ngritur akuzat për shpërdorim detyre dhe korrupsion për zyrtarët e lartë.

Lexo edhe: Si e mbrojti Rama me Veliajn djegien e miliona eurove tek inceneratori i Tiranës

SPAK ka sekuestruar inceneratorin e Tiranës, pasi arriti të provojë se pas këtij projekti ishin të njëjtët personazhe si në inceneratorët e tjerë..

Nga provat e marra gjatë hetimit ka rezultuar se, shtetasit Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k.

NJOFTIMI I SPAK

Prokuroria e Posaçme kundër Korrupsionit dhe Krimit të Organizuar Tiranë po heton në kuadër të procedimit penal nr.255 të vitit 2020, për veprat penale të “Mashtrimi me pasoja të rënda”, në bashkëpunim, “Shpërdorimi i detyrës”, “Korrupsioni pasiv i funksionarëve të lartë shtetërorë ose i të zgjedhurve vendorë”, parashikuara nga nenet 143/3 dhe 25, 248, 260 të Kodit Penal, “Pastrimi i produkteve të veprës penale apo i veprimtarisë kriminale”, e kryer në bashkëpunim, parashikuara nga nenet 287/ gërma “a” dhe “b” të Kodit Penal, e kryer në rrethanën cilësuese “në bashkëpunim”, sipas nenit 287 paragari 2 i Kodit Penal.

Nga aktet e administruara deri në këtë fazë të hetimit, në lidhje me kontratën e koncesionit nr. 6597 prot, datë 31.08.2017 “Ndërtim landfilli, inceneratori dhe rehabilitimi i vendepozitimeve ekzistuese, Tiranë”, lidhur mes Autoritetit Kontraktor Ministria e Mjedisit dhe shoqërisë “Integrated Energy B.V. S.P.V.” sh.p.k,, me kosto të investimit të parashikuar në kontratën koncesionare në vlerën 128,248,330 Euro (njëqind e njëzet e tetë milion e dyqind e dyzetë e tetë mijë, e treqind e tridhjetë) pa TVSH, ka rezultuar se shtetasit Klodian Zoto dhe Mirel Mërtiri janë pronarët “de facto” të shoqërisë “Integrated Energy B.V SPV” sh.p.k, e cila ka fituar kontratën koncesionare “Ndërtim landfilli, inceneratori dhe rehabilitimi i vendepozitimeve ekzistuese, Tiranë”, si dhe janë pronarët “de facto” të shoqërisë mëmë të saj, të themeluar në Hollandë, “Integrated Energy B.V”, ndryshuar më pas me emrin “Geogenix B.V”.

Nga provat e marra gjatë hetimit ka rezultuar se, shtetasit Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k.

Është evidentuar fakti se shtetasit Klodian Zoto dhe Mirel Mërtiri, janë personat që kanë udhëzuar dhe kanë marrë vendimet në lidhje me shoqërinë koncesionare “Integrated Energy B.V SPV” sh.p.k. dhe shoqërinë mëmë në Hollandë me emrin e mëparshëm “Integrated Energy B.V.”, aktualisht “Geogenix B.V.”, që përkon nga momenti i themelimit të këtyre shoqërive e në vijimësi.

Nga aktet e administruara deri në këtë fazë të hetimeve, rezulton se shtetasi Klodian Zoto, në bashkëpunim me shtetasin Mirel Mërtiri, kanë përfituar në sajë të faturave tatimore të falsifikuara, vlerën monetare 409,428,000 (katërqind e nëntë milion e katërqind e njëzet e tetë mijë) lekë, ku shtetasi Klodian Zoto është paraqitur dhe ka deklaruar fatura të falsifikuara për punime të kryera nëpërmjet shoqërisë tjetër të tij “Integrated Energy Services” sh.p.k., si nënkontraktor i shoqërisë koncesionare “Integrated Energy B.V. S.P.V.” sh.p.k. Në kohën e lëshimit të këtyre faturave të falsifikuara, provohet se aksionerë “de facto” kanë qenë shtetasit Klodian Zoto dhe Mirel Mërtiri.

Po ashtu, është evidentuar fakti se shtetasit Klodian Zoto dhe Mirel Mërtiri zotërojnë në mënyrë indirekte shoqërinë “F.M.O.” sh.p.k. Nga hetimi janë mbledhur prova se këta shtetas, duke shfrytëzuar perfitimet e paligjshme kanë blerë për llogari të subjektit “F.M.O.” sh.p.k., një pasuri të paluajtshme, me sipërfaqe 611 m2, me vlerë 1 000 000 Euro, e ndodhur në qytetin e Durrësit.

Bazuar në kërkesën e paraqitur nga Prokuroria e Posaçme, Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.95, datë 28.07.2023, ka vendosur:

1. Pranimin e kërkesës së Prokurorisë së Posaçme Kundër Korrupsionit dhe Krimit të Organizuar dhe vendosjen e masës së sigurimit pasuror “sekuestro preventive” mbi pasuritë si më poshtë:
1.1. Personi juridik “Integrated Energy B.V. S.P.V.” sh.p.k., me Nipt L72031013B, me seli qëndrore në Tiranë, së bashku me të gjitha pasuritë e paluajtshme dhe të luajtshme në pronësi të tij.
1.2. Personi juridik “Integrated Technology Services” sh.p.k., me Nipt L02302032C, me seli qëndrore në Tiranë, së bashku me pasuritë e paluajshme dhe të luajtshme në pronësi të tij.
1.3. Pasuria e paluajtshme në zotërim të shoqërisë “F.M.O.” sh.p.k, lloji pasurisë “njësi”, me sipërfaqe 611 m2, me adresë Durrës.

Me ekzekutimin e vendimit nr.95 datë 28.07.2023 të Gjykatës së Posaçme të Shkallës së Parë Për Korrupsionin dhe Krimin e Organizuar është ngarkuar Drejtoria e Përgjithshme e Policisë së Shtetit dhe Agjencia e Administrimit të Pasurive të Sekuestruara dhe të Konfiskuara.