Krasniqi uron fëmijët për fillimin e vitit të ri shkollor

Kryetari i PDK-së, Memli Krasniqi, ka uruar nxënësit për fillimin e vitit të ri shkollor.

Krasniqi i uroi fëmijët që po fillojnë klasën e parë një rrugë të lehtë e përplot arritje të shkëlqyeshme.

Postimi i plotë:

Të dashur nxënës, mësimdhënës e të nderuar prindër,

Urime fillimi i vitit të ri shkollor! Për ju që po e nisni këtë rrugë për herë të parë, qoftë një rrugë e lehtë, e dashur dhe përplot me arritje të shkëlqyeshme. Pa dyshim, rruga e suksesit në jetë fillon në bankat e shkollës.

Për ju të tjerët që keni filluar më parë, ky vit qoftë më i mirë sesa i kaluari. Tejkalimi i vetvetes nga viti në vit, çdo herë, duhet të jetë synimi i secilit prej jush. Gjithmonë mund të bëheni pak më të mirë e të arrini diçka më shumë.

Juve, të nderuar mësimdhënës, ju uroj një vit të mbarë e të palodhshëm. E admiroj durimin dhe pasionin tuaj për t’u dhënë fëmijëve tanë dije dhe dashuri. E di dhe e besoj se me ju, e ardhmja e vendit tonë është në duar të sigurta.

Të dashur prindër, e di që fëmijët ndoshta jo gjithmonë arrijnë sukseset që ne dëshirojmë për ta. Por, më shumë mbështetje sesa kritika, më shumë dashuri, më shumë punë me ta – do t’i shtyjë ata që gjithmonë të bëjnë më të mirën.

Prandaj, duke pasur gjithmonë parasysh interesin e fëmijëve tanë, të gjithë bashkë, pa përjashtim, t’u japim kujdesin dhe trajtimin që e meritojnë gjatë këtij rrugëtimi.

Urime dhe suksese të gjithëve!