Blinken: Moment vendimtar për arritjen e marrëveshjes së armëpushimit në Gaza

Sekretari amerikan i Shtetit, Antony Blinken, e ka përshkruar përpjekjen e Uashingtonit për të arritur një marrëveshje armëpushimi në Gaza si një “shtytje të fundit diplomatike.”

Gjatë një takimi të hënën me presidentin izraelit Isaac Herzog, Blinken e cilësoi këtë moment si vendimtar për bisedimet e armëpushimit.

“Ky është momenti vendimtar, ndoshta më i miri, ndoshta mundësia e fundit për t’i kthyer pengjet në shtëpi, për të arritur armëpushim dhe për t’i vënë të gjithë në rrugën drejt paqes dhe sigurisë së qëndrueshme”, ka thënë Blinken përpara takimit me Herzogun, shkruan Reuters.

Bisedimet për armëpushim pritet të vazhdojnë këtë javë në Kajro, me shpresën për të finalizuar marrëveshjen e shumëpritur.

Blinken theksoi se është koha që të gjithë palët të pranojnë marrëveshjen dhe të mos kërkojnë justifikime për të kundërshtuar.

“Unë jam këtu si pjesë e një përpjekjeje intensive diplomatike me udhëzimet e Presidentit Biden për të tentuar ta çojë këtë marrëveshje në fund”, ka shtuar ai, duke bërë thirrje për veprim të menjëhershëm.

Pas mbërritjes së Blinkenit, grupi militant Hamas deklaroi se e mban kryeministrin izraelit Benjamin Netanyahu përgjegjës për vonesat në arritjen e marrëveshjes. Ndërmjetësit kryesorë, përfshirë Katarin, Shtetet e Bashkuara dhe Egjiptin, deri më tani nuk kanë arritur të sigurojnë një marrëveshje pas muajsh negociatash.

Kohëve të fundit pasur një urgjencë të shtuar për të arritur një marrëveshje armëpushimi mes frikës së përshkallëzimit në të gjithë rajonin. Irani ka kërcënuar se do të hakmerret kundër Izraelit pas vrasjes së liderit të Hamasit Ismail Haniyeh në Teheran më 31 korrik.