Arifi: Shihet qartë që LVV-ja preferon, Bedri Hamzën, si partner potencial në koalicion!

Njohësi i zhvillimeve politike në vend, Avni Arifi, ka folur në lidhje me zgjedhjet parlamentare të 9 shkurtit.

Arifi tha se pritet që në këto zgjedhje, partitë opozitare, të dalin më mirë se në vitin 2021 sepse i kanë konsoliduar strukturat.

“Unë besoj që të tri partitë opozitare duke përfshirë edhe AAK-ne do të kenë rezultat shumë më të mirë se sa që kishin jë vitin 2021. Nuk besoj se këto tri parti do të kenë ndonjëherë rezultat më të dobët se sa në 2021. Që të tria kanë konsoliduar strukturat e tyre dhe kanë mesazhe shumë më të mira se më parë” tha Arifi për “Gazeta Blic”.

Ai tutje bëri edhe një parashikim se cili nga kandidatët opozitarë për kryeministër do të ishte më ‘rrezik’ për Albin Kurtin.

“Abdixhiku apo Hamza më rrezik? Është vështirë me u përgjegje tani në këtë pyetje sepse varet shumë edhe nga partitë e tyre, zhvillimet, koalicionet dhe fushatat që do të i bëjnë. Përparësitë e Abdixhikut janë se një numër i madh votuesish tradicional të LDK-së që shkuan me Vjosën mund të rikthehen më lehtë në LDK nëse LDK gjen qasjen e duhur. Lumiri është kryetar partie me bagazh akademik dhe bartës liste që është përparësi në krahasim me Hamzan. Hamza e ka “pushtetin” e ndarë me Memlin dhe kjo nëse nuk menaxhohet si duhet mundet edhe të i kushtojë PDK-së. Hamza ka gjithashtu një reputacion të mirë në skenën politike, një ekspert i financave të shtetit dhe rezultati i 2021 i PDK-së i jep një bazë të mirë për rritje më të madhe”

Arifi tha se Lëvizja Vetëvendosje preferon më shumë Bedri Hamzën si partner potencial për koalicion.

“Një po shihet qartë që VV preferon më shumë Hamzën si partner potencial për koalicion por nuk e di a e ndihmon Hamzën apo e dëmton sepse jo shumë njerëz në PDK do të ishin të lumtur me koalicionin VV-PDK” tha Arifi në përgjigjen e tij dhënë për “Gazeta Blic”.

/Gazeta Blic/