Kryeministri polak: Wagner po provokon NATO-n

Polonia deklaron se forcat Wagner që ndodhen në Bjellorusi po i afrohen kufirit dhe sipas kryeministrit, qëllim është destabilizimi i aleancës ushtarake.

“Rusia dhe Bjellorusia po shtojnë presionin në kufijtë tanë, duke rritur numrin e provokimeve dhe ne duhet të tregojmë kujdes pasi provokimet do të shtohen. Folëm me presidentin Nauseda, dhe kjo mund të shihet tani edhe në Lituani, gjithashtu edhe në territorin e Letonisë. Kjo është ajo çfarë provokimi bën, kjo është ajo çfarë intriga dhe komploti i Putinit dhe Lukashenkos sjell. Këto janë aktivitetet operacionale që ndërmerren në anën e tyre, në mënyrë  që të krijojnë destabilizim, trazira, kaos, pasiguri dhe në të njëjtën kohë, të tentojnë të tregojnë dobësi në kahun lindore të NATO-s në sytë e të gjithë partnerëve tanë në NATO”, tha Mateusz Morawiecki, kryeministër i Polonisë.

Mosmarrëveshjet mes Varshavës dhe Minskut janë shtuar ndjeshëm për shkak të strehimit të mijëra mercenarëve të Ëagner, pas dëbimit të tyre nga Presidenti rus Vladimir Putin.

Në fillim të këtij muaji, Polonia filloi të zhvendoste më shumë se 1,000 trupa në lindje të vendit mes shqetësimeve në rritje se prania e luftëtarëve të Grupit Wagner në Bjellorusi, mund të çojë në rritjen e tensionit në kufirin e saj.

Varshava ka qenë e shqetësuar për përhapjen e mundshme të konfliktit në territorin e saj që kur Rusia filloi  luftën në Ukrainë në Shkurt 2022.

/a.r