“Jetojmë në një shoqëri që marrëdhëniet midis njerëzve janë edhe marrëdhënie interesash”/ Shtohen çiftet që jetojnë me prindërit

Çiftet shqiptare po shfaqin tendenca në rritje të bashkëjetesës se tyre me vjehrrin dhe vjehrrën.

Të dhënat e censit tregojnë se rreth 8700 persona jetojnë me prindërit e partnerit, 500 më shumë sesa në vitin 2011. Sociologu Gëzim Tushi thotë se për këtë ka disa arsye materiale dhe shpirtërore.

Gëzim Tushi, shprehet:

“Jetojmë në një shoqëri që marrëdhëniet midis njerëzve janë edhe marrëdhënie interesash. Në ditët e sotme ku punët e të rinjve janë bërë të vështira, të ngarkuara, prania e tyre i ndihmon. Mbi të gjitha të moshuarit janë kujdestarët më të mirë për fëmijët dhe të rinjtë e sotëm e kanë të paktën një farë garancie”.

Jo vetëm çifti, por edhe prindërit e tyre përfitojnë nga jetesa e përbashkët.

“Kur ata jetojnë me nusen me djalin me familjen e përbashkët ata shmangin vetminë, sepse në shoqërinë shqiptare është zgjeruar shumë plaga e vetmisë. Ka 31 mijë të moshuar që jetojnë të vetmuar”, shprehet Tushe.

Megjithatë tendenca e shoqërisë shqiptare ashtu sikurse në gjithë botën është mbizotërimi i familjes bërthamë burrë grua dhe fëmijë.