Pengjet që do të përcaktojnë betejën mes izraelitëve dhe palestinezëve

Një “numër i konsiderueshëm” civilësh dhe ushtarësh izraelitë po mbahen peng nga palestinezët e Hamas në Rripin e Gazës, thotë ushtria izraelite.

Disa janë gjallë, disa të tjerë konsiderohen të vdekur, tha zëdhënësi ushtarak, nënkoloneli Jonathan Conricus për BBC.

Fëmijë, gra, të moshuar dhe të paaftë ishin mes të arrestuarve, shtoi ai.

“Këto janë shifra që ishin deri tani të paimagjinueshme” tha ai. “Kjo do të formësojë të ardhmen e kësaj lufte.”

Sipas Hamasit, numri i izraelitëve të kapur ishte “disa herë më i madh” se dhjetëra, dhe ata ishin shpërndarë në disa vende në të gjithë Rripin e Gazës.

Kryeministri izraelit Benjamin Netanyahu tha se Hamasi është përgjegjës për mirëqenien e tyre dhe Izraeli do të “mbyllë hesapet me këdo që i dëmton ata”.

Pamjet tregojnë izraelitët duke u marrë nga shtëpitë e tyre

Ka shumë video që qarkullojnë në internet, që tregojnë izraelitët në duart e luftëtarëve të Hamasit.

Një prej tyre tregon një kamion që po kalon mes turmës në Rripin e Gazës dhe që supozohet se mbante pengje izraelitë.

Një tjetër video e cila është filmuar në Rripin e Gazës, tregon një grua zbathur duke u tërhequr zvarrë nga pjesa e pasme e një kamioni me duar të gjakosura të lidhura pas shpine.

Disa pengje thuhet se janë marrë nga një festë në natyrë në qytetin Ofakim, në jug të Izraelit – jo shumë larg Gazës.

Dëshmitarët i thanë mediave izraelite se sulmuesit mbërritën me motoçikleta dhe filluan të qëllonin mbi të pranishmit, shumë prej të cilëve janë ende të zhdukur.

Videot e postuara në rrjetet sociale tregojnë një grua që mori pjesë në festë, duke u rrëmbyer dhe mbajtur në një motoçikletë nga dy burra.

Ajo u identifikua nga vëllai i partnerit të saj Moshe Or si një grua izraelite e quajtur Noa Argamani.

Ai e kishte raportuar zhdukjen e saj, përpara se të shihte filmimin. Mes të zhdukurve është edhe vëllai i tij që shfaqet në video, të dy të mbajtur nga disa militantë.

“E pashë Noan në video të frikësuar dhe të frikësuar, nuk mund ta imagjinoj se çfarë po kalon në mendjen e saj – duke bërtitur në panik në një motoçikletë”, tha ai në një intervistë me transmetuesin izraelit Channel 12.

Një video e mëvonshme e tregon atë duke pirë ujë në një dhomë në Gaza.

Situata pengjesh edhe në qytetet izraelite

Jashtë Rripit të Gazës, forcat ushtarake izraelite thuhet se kanë liruar civilët izraelitë që mbaheshin peng në dy lokacione në jug.

Në Kibbutz Be’eri, pengjet që mbaheshin në një dhomë ngrënie u shpëtuan pas 18 orësh, raportuan kanalet televizive të Izraelit.

Raportet e mediave izraelite sugjeruan se deri në 50 persona ishin mbajtur atje.

Duke folur për agjencinë e lajmeve Reuters, një grua e identifikuar si Ella tha se ajo ishte barrikaduar në një strehë me bomba për orë të tëra në qytet.

“Ne mund të dëgjojmë shumë të shtëna, na thanë se terroristët janë në sallën e ngrënies, ne mund të dëgjojmë shumë të shtëna,” tha ajo.

“Kam humbur kontaktet me familjen time. E di që babai im është rrëmbyer… askush nuk po na tregon se çfarë po ndodh. Nuk e di nëse nëna ime është gjallë.”

Një video tregon militantët në Be’eri duke udhëhequr njerëz zbathur përgjatë një rruge. Është e paqartë nëse ata ishin të njëjtët pengje si ata të mbajtur në sallën e ngrënies.

Ndërkohë, në Kibbutz Urim, një periferi në qytetin Ofakim, dy izraelitë u shpëtuan pasi u morën peng nga militantët e Hamasit në një shtëpi për orë të tëra të shtunën.

Persona të armatosur kishin hyrë në qytet dhe kishin hapur zjarr ndaj banorëve, raportuan mediat izraelite.

Dy banorë që kishin qëndruar në banesën e tyre, ishin marrë peng nga katër militantë, të cilët u vranë më vonë nga forcat izraelite.

Tre ushtarë izraelitë u plagosën gjatë operacionit të shpëtimit, tha Kan.

Luftimet midis forcave izraelite dhe grupit palestinez Hamas vazhdojnë me qindra të vrarë nga të dyja anët, pas një sulmi të befasishëm ndaj Izraelit, i cili bëri që kryeministri Benjamin Netanyahu të paralajmëronte “një luftë të gjatë dhe të vështirë”.

Në luftime

Ndërkohë në anën tjetër të kufirit, 2.3 milionë palestinezë që jetojnë në Rripin e Gazës e kaluan natën në terror dhe errësirë. Izraeli intensifikoi sulmet ajrore dhe ndërpreu energjinë në enklavën bregdetare.

Sulmet izraelite rrafshuan ndërtesat e banimit në shpërthime gjigante, duke përfshirë një kullë 14-katëshe, që mbante dhjetëra apartamente si dhe zyra të Hamasit në qytetin qendror të Gazës.

Ushtria izraelite tha se forcat e saj goditën shtëpinë e shefit të inteligjencës së Hamasit në Rripin e Gazës. Netanjahu u zotua për “hakmarrje të fuqishme” kundër Hamasit.

Izraeli qëlloi me breshëri artilerie në Libanin jugor, pasi Hezbollahu shënjestroi tre pozicione ushtarake izraelite në fermat e diskutueshme Shebaa.

Forcat izraelite kanë marrë kontrollin e një stacioni policie në qytetin jugor të Sderot, duke vrarë të paktën 10 luftëtarë palestinezë pas një përplasjeje disa orëshe, sipas mediave lokale.

Brigadat Qassam të Hamasit thanë se luftëtarët e saj ishin ende të përfshirë në “përleshje të ashpra” në disa qytete brenda Izraelit.

Diplomacia

Këshilli i Sigurimit i Kombeve të Bashkuara (KSKB) do të mbajë konsultime urgjente të mbyllura këtë të dielë lidhur me përshkallëzimin e dhunës.

Takimi u thirr fillimisht nga Malta, aktualisht një anëtare e KS të OKB-së, me Emiratet e Bashkuara Arabe (EBA) dhe Brazilin që më vonë e mbështetën atë.

Kina tha se ishte “thellësisht e shqetësuar” nga përshkallëzimi dramatik i dhunës në fundjavë midis Izraelit dhe palestinezëve, duke u kërkuar të gjitha palëve të tregojnë “qetësi”.

Egjipti është në bisedime me Arabinë Saudite dhe Jordaninë për të zbutur tensionet palestinezo-izraelite, tha Ministria e Jashtme egjiptiane.

Ministri i Jashtëm jordanez Ayman Safadi paralajmëroi për “paqëndrueshmërinë” e situatës, “veçanërisht në dritën e asaj që qytetet dhe zonat e Bregut Perëndimor janë dëshmitarë të sulmeve dhe shkeljeve izraelite kundër popullit palestinez”.

Arabia Saudite bëri thirrje për “ndërprerje të menjëhershme të dhunës”.

Presidenti amerikan Joe Biden i përshkroi sulmet e Hamasit të së shtunës në Izrael si “të papërgjegjshme” dhe administrata e tij u zotua të sigurojë që Izraeli të ketë “atë që i nevojitet për të mbrojtur veten”.

Viktimat e luftimeve

Numri i palestinezëve të vrarë në Rripin e rrethuar të Gazës është rritur në 256, thonë zyrtarët shëndetësorë. Rreth 1800 të tjerë u plagosën. Numri i të vdekurve në Rripin e Gazës përfshin 20 fëmijë, sipas Ministrisë së Shëndetësisë. Të paktën 120 të mitur u plagosën.

Ushtria izraelite thotë se të paktën 26 ushtarë u vranë në sulmin e paprecedentë të Hamasit në jug të vendit. Në total, të paktën 300 izraelitë janë vrarë, sipas raporteve të mediave lokale./ Përshtati