E bujshme, Armand Duka zgjidhet në postin e zv.Presidentit të UEFA-s

Jo thjesh një anëtar i Komitetit Ekzekutiv të UEFA-s, Presidenti i FSHF-së, Armand Duka tashmë është numri 2 i qeverisë që udhëheq futbollin kontinental. Duka është zgjedhur tashmë në postin e Zv.Presidentit të UEFA-s, duke u bërë i pari shqiptar që arrin në një pozicion kaq të lartë në hierarkinë e futbollit europian.

Vendimi u mor sot në mbledhjen e radhës së Komitetit Ekzekutiv të UEFA-s. Ky komitet zgjodhi pikërisht Presidentin Duka me votim unanim në postin e numrit dy të qeverisë së futbollit europian. Një vendim që vjen pas një kontributi të madh ndër vite të Presidentit të FSHF-së, edhe në menaxhimin e futbollit në Europë.

Lexo më tej: Raport i ngushtë me Ceferin, Duka ngjit shkallët: zgjidhet kryetar i Komisionit të Medias në UEFA

Një tjetër votëbesim i rëndësishëm për numrin 1 të futbollit shqiptar, që pak muaj më parë u zgjodh për herë të dytë anëtar i Komitetit Ekzekutiv të UEFA-s në Kongresin e 47-të të UEFA-s që u zhvillua në Lisbonë, Portugali. Në këto zgjedhje Presidenti Duka arriti rekordin e votave, duke u zgjedhur me 45 vota në total nga 55 të tilla. Duka mori kështu për herë të dytë besimin e delegatëve të shumë federatave të mëdha europiane.