Dora e munguar e “këshilltarit mizerabël” në fushatën e Berishës

“Këshilltari mizerabël” ishte një term i përdorur nga Sali Berisha, për një nga strategët elektoralë të PD-së në vitin 2017. Berisha, sulmoi atëherë Bashën pas zgjedhjeve të vitit 2017, por e mbështeti për ta mbajtur drejtimin e PD-së, ndërsa vetë të rrijë në prapaskenë.

Inati i Berishës në atë kohë ishte në të vërtetë, me marrëveshjen mes Edi Ramës dhe Lulzim Bashës, që në thelb kishte kthimin e opozitës në Kuvend për të votuar vetingun, që kishte mbajtur peng ecjen e reformës në drejtësi.

Në zgjedhjet e vitit 2017 ndodhi një gjë e çuditshme, kur rreth 150 mijë vota i fluturuan menjëherë PD-së drejt LSI-së. Vota, të cilat në vitin 2021 u rikthyen thuajse të gjitha në shtëpinë e tyre, duke rritur e konsoliduar rezultatin e Partisë Demokratike.

Por edhe pas atyre zgjedhjeve, Berisha thumboi strategët izraelitë të fushatës së Bashs, të cilët duhet thënë se zhvilluan një punë të suksesshme për të rikthyer votat e fluturuara.

Ndërkaq sot, në pritje të ardhjes së “sherifit” siç po e quajnë këshilltarin amerikan Chris Lacivita, fushata e PD-së duket në një çorganizim të përgjithshëm. Kjo jo vetëm nga gafat që mund të ndodhin nga doktori, si pasojë e aktivitetit të ngjeshur. Se helbete moshë shumë e shtyrë.

Problemi kryesor është mungesa e një skalete apo skeleti politik dhe programor të fushatës në mënyrë që të shpjegohen në publik, jo vetëm nga Sali Berisha, por edhe të tjerë drejtues të opozitës.

Opozita duhet të kishte krijuar një trupë ikonike të deklamimit politik në media dhe tubime të ndryshme. Të caktonin një kalendar prioritetesh të përdorimit publik të çështjeve, siç bëjnë profesionistët e fushatave.

Ne kemi parë që Berisha ka pasur një deklamim kaotik të propozimeve ekonomike, çka janë përdorur si ironi tallëse nga propaganda e mazhorancës.

Mirëpo ajo që duket më e rëndë, është mos pasja e një ideje të një platforme fushatës, çka bën që të hidhen bomba tymuese pa fund.

Sot për shembull, Berisha tha se kur të vijë në pushtet, PD-ja do të kthejë të gjitha lekët e vjedhura nga zyrtarët e korruptuar. Një boomerang politik që mund t’i kthehet fytyrës menjëherë sapo është hedhur në publik.

“Do ua gjejmë pasuritë në Shqipëri dhe ku i kanë dhe do të shiten për t’ua kthyer paratë shqiptarëve, do të përdoren për politika sociale”, tha Berisha.

Një qeveri nuk ka mundësi që tu kthejë qytetarëve paratë e vjedhur nga zyrtarët, këtë e bën vetëm drejtësia dhe askush tjetër. E cila siç dihet ka sekuestruar paraprakisht disa prona të Berishës dhe familjarëve të tij.

Sipas të gjitha gjasave kjo lloj mënyrë e fushatës nuk bind as fanatikët më të flaktë të Berishës, të cilët votojnë si tifozeri. Lërë më pas elektorati gri, i cili nuk i ha këto thana. Si ky qëndrim i palogjikshëm ka sa të duash, por thelbi është se mungon një dorë mjeshtri fushatash që të përgatisi skaletat dhe mënyrën e PR-it.

La Civita, edhe pse nuk ka ardhur në Shqipëri, duhet të kishte sjellë të paktën, apo edhe duke punuar online, strategjinë e fushatës në një material të shkruar, siç veprojnë të gjithë. E me kalimin e ditëve, dora e munguar e “sherifit” po shton edhe më shumë misterin e angazhimit të tij.

Në vitin 2005, BG&R përgatiste gjithçka që nga fillimi i vitit deri në korrik. Në zgjedhjet e 2021, strategët izraelitë ishin pranë Bashës që prej vitit 2020.