Rikthimi pas ndarjes, paqe mes Ahmetajt dhe Ramës?
16.03.2023 – 10:44
Asnjë nuk zgjat përgjithmonë. As “ndarja” e kryeministrit Edi Rama me ish-zv.kryeministrin Arben Ahmetaj nuk mbeti pa asnjë bashkim. Kjo ka ndodhur sot, pasi kryeministri Rama ka publikuar fotot nga rindërtimi në fshatin Bubq.
“MIRËMËNGJES, dhe nga Bubqi i rilindur pas rrënimit, tashmë edhe me godinën që do të ofrojë të gjithë shërbimet publike, si edhe me shkollën e re, palestrën e amfiteatrin aty pranë, ju uroj një ditë të mbarë,“-shkruan në postimin e tij nga kreu i qeverisë.
Ndërkohë që postimin e ka ripostuar vetë Ahmetaj, i cili ka mbajtur postin e ministrit të Rindërtimit.
“Përplasja” mes tyre pati kulmin kur Agjentët e Byrosë Kombëtare të Hetimit dhe prokurorët e Strukturës së Posaçme kundër Korrupsionit dhe Krimit të Organizuar “vendosën shiritin” në banesat e ish-zv.kryeministrit të vendit, Arben Ahmetajt. Ngjarja vjen pas një deklarate që bëri kryeministri Edi Rama.
“Nëse unë do të kisha bërë rolin e gjykatësit, gjërat do të kishin qenë shumë më keq për ata që duan që unë të bëj rolin e gjykatësit,”-këtë fjali tha kryeministri Edi Rama sot në mëngjes, duke iu përgjigjur Ahmetajt pasi ky i fundit, i ftuar në “Opinion”, i kërkoi që të sillej si një kryeministër e jo gjyqtar.
“Unë Edi Ramës nuk i kam kërkuar ndonjëherë ndihmë, por po i jap një sugjerim. Nuk do të doja të isha në pozicionin e kryeministrit, të bëhesha gjykatës,”– thoshte Ahmetaj në “Opinion”.
Por mesa duket se ‘paqja’ mes tyre është rivendosur…e gjitha mesa duket falë Bubqit!
