Izraeli bllokon hyrjen e të gjithë ndihmave humanitare në Gaza –

Qeveria izraelite ka bllokuar hyrjen e të gjithë ndihmave humanitare në Gaza për shkak se faza e parë e armëpushimit me Hamasin ka skaduar. Zyra e kryeministrit Benjamin Netanyahu tha se Hamasi deri më tani kishte refuzuar të pranonte një zgjatje të përkohshme të armëpushimit sipas një propozimi të të dërguarit të presidentit amerikan Donald Trump, Steve Witkoff.

Një zëdhënës i Hamasit e quajti lëvizjen “shantazh të lirë” dhe “grusht shteti” në marrëveshjen e armëpushimit dhe u kërkoi ndërmjetësve që të detyronin Izraelin të rifillonte furnizimin me ndihma.

“Me përfundimin e fazës 1 të marrëveshjes së pengjeve dhe në dritën e refuzimit të Hamasit për të pranuar skicën e Witkoff për vazhdimin e bisedimeve, për të cilat Izraeli ra dakord, Kryeministri Netanyahu ka vendosur që nga mëngjesi i sotëm, të gjitha hyrjet e mallrave dhe furnizimeve në Rripin e Gazës do të ndërpriten. Izraeli nuk do të lejojë një armëpushim pa lirimin e pengjeve tanë. Nëse Hamasi vazhdon refuzimin e tij, do të ketë pasoja të mëtejshme”, thuhet në njoftimin e Kryeministrisë.

Grupi palestinez dëshiron që faza e dytë e marrëveshjes të vazhdojë siç ishte negociuar fillimisht, me lirimin e pengjeve dhe të burgosurve palestinezë dhe tërheqjen e forcave izraelite nga Gaza.

Më herët, Hamasi tha se nuk do të pajtohej me asnjë zgjatje të fazës së parë pa garanci nga ndërmjetësit e SHBA-së, Katarit dhe Egjiptit se faza e dytë do të ndodhte përfundimisht.

“Vendimi i Netanyahut për të ndaluar dërgimin e ndihmave në Gaza tregon edhe një herë fytyrën e shëmtuar të okupimit izraelit. Komuniteti ndërkombëtar duhet të ushtrojë presion mbi qeverinë izraelite për të ndaluar vdekjen e popullit tonë nga uria”, tha zëdhënësi i Hamasit.

Faza e parë e armëpushimit që hyri në fuqi më 19 janar skadoi të shtunën e 1 marsit, ku u liruan 33 pengjeve izraelite dhe pesë tajlandeze për rreth 1900 të burgosur dhe të paraburgosur palestinezë.

Negociatat për fazën e dytë, duke përfshirë lirimin e të gjithë pengjeve të mbetura të gjallë dhe dorëzimin e pengjeve të pajetë si dhe tërheqjen e trupave izraelite nga Gaza, është ende të paqarta se si do të shkojë.