E vrau me çekiç dhe i vodhi paratë që kishte në xhep, arrestohet Isuf Hasa për vrasjen e Xhemal Metës

Isuf Hasa, 64 vjeç është autori i vrasjes së 81-vjeçarit Xhemal Meta në Zall-Bastar, i cili është vënë në pranga.

Në një komunikatë për shtyp, Policia bën të ditur se Isuf Hasa, fqinj me viktimën ka shkuar me datë 13 Janar rreth orës 09:00 në banesën e të moshuarit dhe për motive të dobëta e ka goditur me çekiç pas koke.

Uniformat blu kanë ushtruar kontrolle dhe në banesën e vajzës së Isuf Hasës, ku kanë gjetur çekiçin me të cilin autori ka kryer vrasjen e Xhemal Metës.

Pas kryerjes së ekzaminimit mjeko-ligjor, ka rezultuar se 81-vjeçari kishte dëmtime në pjesën e pasme të kokës.