U mposhtën 0-6 nga Interi, trajneri i Lazios: Më vjen keq, jam i mërzitur

Trajneri i Lazios, Marco Baroni, mori përgjegjësinë e plotë për humbjen e rëndë 0:6 në shtëpi ndaj Interit në ndeshjen e xhiros së 16-të të Serisë A.

Para ndeshjes, dy skuadrat ishin të barabarta në pikë, por Nerazzurrët treguan pse janë favoritë të qartë për titullin kampion.

“Jam i mërzitur për ekipin dhe tifozët. Marr përgjegjësinë e plotë për këtë disfatë. Kemi kaluar 40 minuta të mira, por kjo nuk mjaftoi, skuadra ra në nivel emocional, humbëm dhe lejuam gjëra që nuk mund t’i japësh një ekipi të fortë si Interi”, tha Baroni.

“Natyrisht që nuk isha i mirë në menaxhimin e nivelit emocional të ekipit dhe marr përgjegjësinë e plotë për këtë. Unë kam folur tashmë me ekipin, tani duhet të punojmë dhe të kthehemi në rrugën e duhur,” vazhdoi ai.

“Nuk duhet të ndodhë që një ekip si i yni thjesht të humbasë rrugën. Ka pasur momente fati të keq, por kjo nuk është justifikim. E kuptoj që ka lodhje pas kaq shumë ndeshjesh, por skuadra nuk mund të shpërbëhet kështu. Unë jam i sigurt se ky do të jetë një moment i mësimit”, përfundoi ai.

/ Sport/