FSHF-ja reagon, dënon sjelljet e tifozëve çekë

Federata Shqiptare e Futbollit ka reaguar menjëherë pas ndeshjes së sontme ndaj Çekisë.

Shqipëria u mposhtë 2-0 në Pragë, mirëpo gjatë ndeshjes në sy ranë edhe tifozët vendas.

Ata shpalosën një flamur me hartë të Kosovës e me ngjyra të Serbisë që shkruan “Nuk ka dorëzim”.

Po ashtu, kishin kthyer mbrapshtë edhe flamujt shqiptar.

Për këtë reagoi edhe FSHF-ja, duke dënuar këto sjellje.

Postimi i plotë:

“𝐑𝐞𝐚𝐠𝐢𝐦 𝐢 𝐅𝐞𝐝𝐞𝐫𝐚𝐭𝐞̈𝐬 𝐒𝐡𝐪𝐢𝐩𝐭𝐚𝐫𝐞 𝐭𝐞̈ 𝐅𝐮𝐭𝐛𝐨𝐥𝐥𝐢𝐭

Federata Shqiptare e Futbollit dënon me forcë aktet e turpshme që ndodhën gjatë ndeshjes së sotme kundër Çekisë. Koret raciste dhe përdhosja e flamurit shqiptar janë të patolerueshme dhe nuk i takojnë fushës së futbollit. Ky akt i rëndë përbën një sulm të hapur ndaj vlerave të futbollit dhe respektit midis kombeve.

Federata Shqiptare e Futbollit dënon fuqimisht çdo formë të racizmit dhe fyerjes ndaj simboleve kombëtare dhe do të dërgojë një notë proteste në UEFA, duke kërkuar masa të menjëhershme disiplinore. FSHF reagoi menjëherë që në pushimin e pjesës së parë duke u kërkuar organizatorëve marrjen e masave të menjëhershme ndaj këtyre akteve për të mos radikalizuar veprimet me ndërprerjen e lojës.

Futbolli është një lojë që bashkon dhe unifikon gjithë popujt duke promovuar barazinë dhe respektin për të gjithë, pavarësisht kombësisë apo përkatësisë etnike. Shqiptarët, si pjesë e familjes së madhe futbollistike, do të qëndrojnë gjithmonë në mbrojtje të këtyre vlerave dhe nuk do të tolerojnë asnjë formë racizmi apo urrejtjeje duke dënuar me forcë çdokënd që tenton të përdhosë bukurinë e këtij sporti.

Pavarësisht ndeshjes së sotme, Kombëtarja jonë ka treguar gjithmonë forcë dhe guxim për të përballuar çdo vështirësi duke u ngritur pikërisht atëherë kur lind nevoja. Bashkë me tifozët do të lëmë pas këtë ndeshje dhe bëhemi gati për të shkuar në Gjeorgji për një rezultat pozitiv.”