Zgjedhjet në 2025, KQZ letër partive: Votimi elektronik të bëhet në qarqet Elbasan dhe Durrës

Komisioni qendror i Zgjedhjeve (KQZ) propozon që në zgjedhjet e vitit 2025, votimi elektronik të kryhet vetëm në qarqet Elbasan dhe Durrës. Në një letër drejtuar partive politike në vend, ku i kërkon një mendim lidhur me këtë propozim, KQZ shprehet se për shkak të kohës së pakët në dispozicion, votimi elektronik nuk mund të zhvillohet në 5 qarqe, një mundësi që ishte shqyrtuar më parë, por vetëm në 2.

“Në vijim të komunikimeve të mëparshme të Komisionit Qendror të Zgjedhjeve (KQZ) me ju mbi mundësinë e zhvillimit të votimin elektronik në 5 qarqe, në zgjedhjet për Kuvendin e Shqipërisë të vitit 2025, më lejoni t’ju sjellë në vëmendje se kjo mënyrë votimi në këtë numër qarqesh nuk mund të zhvillohet. Periudha nga sot deri në datën 20 Prill 2024 që është data e parë e mundshme e zhvillimit të zgjedhjeve në fjalë, apo deri në datën 11 Maj 2024 që është data e fundit e mundshme për zhvillimin e zgjedhjeve të vitit 2025, është e pamjaftueshme për përgatitjen e gjithë elementëve teknik dhe njerëzor për zhvillimin e këtij lloj votimi në këtë numër qarqesh. Gjithsesi duke vlerësuar interesin dhe dobinë për shtrirjen graduale të votimit elektronik, KQZ për zgjedhjet për Kuvendin e Shqipërisë për vitin 2025, propozon zhvillimin e kësaj mënyre votimi vetëm në qarkun e Elbasanit dhe në atë të Durrësit”, thuhet në letrën e KQZ-së.

Komisioni Qendror i Zgjedhjeve sqaron se  u zgjodhën qarqet Durrës dhe Elbasan, për shkak të lehtësive që  ofronin për implementimin e votimit elektronik.

Elbasani u zgjodh për shkak se votimi elektronik u zhvillua për zgjedhjet e 14 majit të vitit të kaluar dhe KQZ arsyeton se është me kuptim që të shtrihet në ato njësi zgjedhore ku një pjesë e votuesve e kanë një eksperiencë të mëparshme me këtë lloj votimi. Qarku i Durrësit u propozua për lehtësitë logjistike dhe njerëzore që ofron ky qark krahasuar me qarqe të tjerë të vendit, edhe për shkak të afërsisë me Tiranën.

“Në qarkun e Elbasanit u zhvillua votimi elektronik për zgjedhjet e datës 14 Maj 2023 në shumicën e qendrave të votimit të këtij qarku, të cilat i përkasin bashkisë Elbasan. Ndaj nëse nga ana juaj vlerësohet me dobi dhe interes shtrirja e votimit elektronik, është me kuptim që më së pari ai të shtrihet në ato njësi zgjedhore ku një pjesë e votuesve të kësaj njësie e kanë një eksperiencë të mëparshme me këtë lloj votimi.

Rekomandoj zhvillimin e votimit elektronik në qarkun e Durrësit, për lehtësitë logjistike dhe njerëzore që ofron ky qark krahasuar me qarqe të tjerë të vendit. Durrësi për shkak të terrenit gjeografik, infrastrukturës rrugore dhe asaj tjetër, distancës me Tiranën (KQZ-në), mundëson një përgjigje më të mirë nga ana e këtij institucioni për përgatitjen, zhvillimin dhe administrimin e votimit elektronik.

Nga ana tjetër ky lloj votimi kërkon angazhimin e një numri të madh njerëzish në terren. Praktika e identifikimit elektronik ka treguar se për qarkun e Durrësit në përgjithësi rekrutimi i personelit të posaçëm për këto procese administruese zgjedhore është më pak sfidues se në shumë qarqe të tjerë. Numri dhe natyra e punës që kryen personeli që do të angazhohet me votimin elektronik është thuajse e njëjtë me atë të identifikimit elektronik”, shkruan KQZ.

/a.r